5萬6出車　豪嘆老細Feel

想買部豪華房車過吓老闆癮，唔一定要掟幾百萬出嚟，又或者買部年紀有番咁上下嘅舊車先可以成事，事關Mercedes-Benz最近就幫佢哋嗰款Facelifted嘅新E230推出頂級Avantgarde版本，雖然佢只係同款車頂級型號嘅入門版，但內外都一樣咁豪，而且車價都未使56萬，比本來這頂級型號平十多萬，係咪吸引好多呢？

記者：鄭達基　
攝影：伍慶泉　
模特兒：Debby（BXMedia）

Top版內裝無欺場

話咗呢部E230Avantgarde係頂級版嘅入門型號，所以Mercedes-Benz喺為佢選配車廂裝備嗰陣，都揀晒啲最Top、最靚嘅嘢先放落去，完全唔會有機會俾你話佢欺場㗎！
當你打開車門嗰陣，你先會見到車廂四周有好多雀目紋桃木裝飾，跟住又會發覺前後兩排座椅都係用頂級嘅真皮嚟裝嵌，加埋闊落得厲害嘅車廂空間，坐落去都會覺得Grand啲舒服啲。擰轉面再睇埋佢個中控台，感覺上同以前嘅差唔多，但勝在設備好齊全，只係控制鍵多咗啲，要花啲時間適應囉！最可惜嘅係如果要埋個可以等你同愛人曬月光嘅電動天窗，就要訂車嗰陣喺荷包拎多$12,500出嚟先可以擁有，若然可以變做標準裝備嘅話，我諗會好好多。

a.既然稱得上係豪華房車，車廂入面又點會無雀目紋桃木裝飾！

b.用嚟裝嵌座椅嘅物料，當然係最頂級嘅真皮啦！

c.後排空間闊落，就算你「神高神大」都唔怕坐得唔舒服。

GrandLook齋睇都豪

E230Avantgarde唔只車廂陳設講究豪華，就連佢嘅造型都一樣風格，可以話係齋睇個外觀都已經覺得佢同啲頂級豪華房車無太大分別。
始終呢部E230Avantgarde係Facelifted新版，喺外觀上同舊嘅有好大分別，例如車頭線條比以前嚟得低斜，而令唔少車迷為之着迷嘅橫柵式電鍍鬼面罩，中間一部份變成咗尖角嘅設計，泵把亦都換咗全新Design，從而令到成部車嘅Look當堂Grand好多。走去車尾，你就會見到尾燈都有些少改動，係咩？咪就係用咗透光度高嘅LED燈囉！

■由於重心偏低，配17吋輪胎，高速走彎一樣咁定。

■四圓頭燈組合，內藏高照明度嘅Bi-Xenon燈！

■要有頂級享受，又點可以唔用17吋嘅大胎軨呢？

■略向外尖嘅電鍍橫柵式鬼面罩，至今仍叫Fans為其着迷。

2.5V6慳油好力

喺機械配搭上，廠方亦都不敢求其了事，選配嘅係一台2.5公升V6DOHC引擎，佢嘅賣點除咗可以輸出高達204匹嘅馬力，以及喺2,900-5,500rpm時輸出達245Nm嘅扭力之外，就連平均耗油量亦屬偏低水平。若以現時$14.72嘅油價同廠方公佈9.4L/100km嘅平均耗油量嚟計算，即每公里嘅平均耗油量都係$1.4左右，計落同啲同級嘅日本車，都係差唔多咋喎！至於引擎嘅拍檔就係最新嘅7G-Tronic半自動型號，可選用全自動操作之餘，如果想跟隨自己喜好嚟轉波拖波，又可以將之變成半自動操作，咁你仲要問佢嘅性能表現係點？