小妹一向都好鍾意食日本嘢，最愛佢好味得嚟又唔肥膩；早兩日知道板前壽司個老闆喺日本投咗條重276公斤吞拿魚王，我當然唔會放過，即刻打去訂位，落埋order留番幾件最正嘅大拖羅畀我。
小妹一直都係板前嘅fans，價錢固然大眾化，最緊要係嗰度有個日本嚟嘅靚仔師傅石山先生，一邊食魚王，一邊睇靚仔，就係人間一大享受。姊妹們唔好飛擒大咬，石山師傅已經結咗婚㗎喇！
板前副總經理麥建成話，老闆啱啱再投咗另一條吞拿魚王，重200公斤、身價20幾萬，今晚會喺各間分店供應，拖羅嘅售價每件50至150蚊，其他位置18至90蚊。
食家李純恩話，拖羅係吞拿魚嘅肚腩，係最好味嘅部份，分大拖羅同中拖羅，大拖羅要有少少筋先叫最肥美，可作刺身或剁碎啲肉加葱一齊食。雖然冇話越大條吞拿魚代表越好味，但「魚王」係藍鰭品種，屬於高級數，拖羅每件50蚊起勁抵食。
逢周一至周四刊出