打工仔最重視年尾份雙糧，過節交稅都靠佢，早排傳出後勤最多攞40個月糧嘅美聯（1200），噚日再宣佈，逢係做滿一年嘅後勤，都有多4個月糧，加埋舊年時不時派吓嘅花紅賞金大約2.2個月糧，07年累積會攞到18.2個月糧，交完稅去埋旅行仲可以有錢剩，認真和味。
至於邊個攞最多40個月？美聯內部話仲未揭盅，除非老闆黃建業想搞大佢當宣傳，否則，個幸運兒可能一直唔會有人知係邊個。話時話，唔畀人知好過知，如果唔係，睇怕俾人唔知屈幾多餐大大鑊都似。
至於同一個老闆嘅香港置業，後勤嘅年尾花紅同美聯睇齊，都係攞多4個月，不過唔同美聯，冇後勤累積攞40個月糧咁誇，二奶仔4個月已經係上限，但計埋之前派過嘅花紅，全年累計最多嗰位都有17.25個月糧。至於平均數，港置內部就話唔方便透露，咁邊個攞最多？亦係唔講得，睇怕理由同美聯嘅情況類同。
兩間公司規模唔同，正如大細婆咁，待遇都有差別，咁樣新一年做細嘅要力爭上游，最直接就係整大佢。港置行政總裁胡日發話，今年目標係由60間分行加到去70間。美聯𠵱家有大約240間分行，早排話今年會開多10%分行，即係目標係260幾間。