手機睇數碼電視<br>16:9超闊落

手機睇數碼電視
16:9超闊落

近期鑊氣多多嘅高清數碼電視，畫質唔對辦之餘，又經常受干擾，搞到發燒友聞機色變！諗住行街睇數碼電視嘅話，𠵱家就有好多選擇。國產天語剛返咗一款為電視迷而設嘅手機，屏幕闊度為16:9，睇電影夠晒逼真，加埋支援IPTV（網絡電視）功能，邊度上到網就可以隨時睇電視！

記者：陳國輝
攝影：黃子偉
Model：Maggie

BodyCheck!

■具備數字Keypad之餘，仲有輕觸屏幕功能。

■跟機送有線立體聲Handsfree，聽歌啱晒。

■順時針就可以開啓相機鏡頭，但個掣好實。

■拆開機殼及電池，可發現支援microSD卡。

WQVGA靚芒直出電視

手機高清畫面當然冇1080P咁細緻，所謂「HDMobile」，就係屏幕解像度達320×240Pixels（QVGA）咁解，若然個芒再闊啲，睇電視、睇片就會令雙眼更舒服。今次，E60原來唔止QVGA解像度，仲係更高級嗰隻400×240Pixels（WQVGA），搭埋個2.8吋16:9闊屏幕，據專家講，闊畫面最啱用來煲電影，優點在於夠逼真。機內仲附送埋一齣專為16:9而設嘅《泰拳》Trailer，睇住TonyJaa拳來腳往，不知幾過癮！
但提到支援IPTV，E60就令人失望。所謂網絡電視，意思係集互聯網、多媒體、通訊於一身嘅服務，如早年前PCCW採用自家寬頻推出有「機頂盒」的IPTV，集新聞、電影及音樂等多條頻道。E60的Icon寫明「IPTV」，試用時一直顯示「接駁發生問題」訊息，跟住要重新連接，係龍定係蟲？無從稽考。

■「手機電視」功能一直唔Work，試唔到！

■提供TV-Out線，拍完片可直出電視。

■《泰拳》採用16:9顯示，感覺闊落。

EDGE上網快靚歌照撈

雖然用E60睇IPTV無望，但上網速度唔錯，佢支援俗稱2.75G的EDGE技術，試過上WAP幾快，但因為唔支援3G串流影片格式，想感受吓都唔得。另外，E60配備400萬像素相機，功能幾齊，包括4倍數碼變焦、自動對焦、微距拍攝、連拍及調校白平衡，同時也可攝錄3GP格式，並可播放MPEG4及H.263影片。至於聽歌方面，支援5種最Hit格式，更可用無線藍芽耳筒欣賞㖭！