《蘋果日報》名采版於一月一日改版，大部份專欄包括「GG細語」，改為直排，觀感為之一新。左丁山買書、睇書，以直排書為主，橫排總係差一啲。
唔好以為左丁山年紀漸大，唔肯接受新事物。一位四十歲教授年青力壯，在大陸長大，應該好接受橫排書報啦？哈，誰知不然，呢位出名人物話好鍾意直排喎，而且理由十分愛國。
呢位教授就係錢文忠。一九六六年出生，無錫錢家後人，讀書不追求功利，考入北京大學讀梵文、巴利文咁冷門嘅學科，整個中國，只有國學大師季羨林可以教佢。後到德國留學，攻印度與西藏歷史文化，副修伊朗學，現為復旦大學歷史系教授，因在央視「百家講壇」講三十六集「玄奘西遊記」，廣為普通人認識。佢將講稿增補出書，○七年十一月出台灣版。錢教授在台灣版自序話：「我堅持要求《玄奘西遊記》的台灣版必須直排。這個要求裏面當然隱含我對中國文化傳統的珍愛和追慕……王元化先生的文章和熊十力先生的逸事，說明的都是大道理。我在堅持直排的時候，想的卻是一個小問題。讀直排的書，腦袋是上下移動的，似先表敬畏之心；讀橫排的書，腦袋是左右晃動的，似先露輕蔑之意。哪種比較接近於熊十力先生的心意呢？竊以為，應該是前一種。」
錢先生幸而生於一九六六，因太年幼，避過文革一劫，愛上中國傳統學問，今成一家之言。睇得多《西遊記》，大家以為唐三藏蠢蠢地，到西方取經全靠孫悟空。因《西遊記》故事太流行，歷來唔見有幾多學者出版研究真實的唐玄奘如何自長安前往印度學習佛經、翻譯為中文，返回中國弘揚佛法之歷史。錢文忠呢本《玄奘西遊記》講嘅係真實歷史，全書四百四十七頁，附以圖片，可讀性十分高。左丁山買咗呢本書方知，季羨林有錢文忠呢位閉門弟子，中國還有年青人專心研究冷門學科。呢類學者唔會俾上市公司聘為顧問，賺大錢。我哋買書支持佢，算係一番心意。