張學友的世界巡迴演唱會歷時一年，到本月25日開始在港演出5場後便告結束，總共演唱104場的學友，至少賺逾2億元，荷包脹爆過肥年。學友昨日宣佈結束巡迴個唱後將休息1年，留在家思考及看08年北京奧運，提到進行得如火如荼的樂壇頒獎禮，他則直言感到失望。
張學友將於本月25至27日及下月1及2日，在西九龍中天地舉行5場「學友光年世界巡迴演唱會07香港GrandFinale」，作為其巡迴個唱的尾站，門票明日正式公開發售。學友的世界巡迴個唱，於去年2月在美國拉斯維加斯揭開序幕，到下月結束剛好歷時1年。據悉學友在香港開騷一場約收120萬港元歌酬，在內地則會因應不同地區及演出場地規格而收不同價錢，最高曾收400萬人民幣1場，拉上補下，平均每場至少賺200萬港元，演出104場個唱共賺至少2億港元，名副其實億萬富翁。
聲線良好
「多場數係最大壓力」
昨日學友自新加坡演出後返港，他在機場接受訪問時，透露稍後還要陸續到新西蘭、台灣及馬來西亞表演。他說：「過去做咗1年嘢，08年要休息，我要留喺屋企思考同睇奧運。」談到劉德華完成中國巡迴演唱會後有9個月閒暇，學友則說：「咁我要休息1年就差唔多，但我唔係唔做其他表演，做少啲啦。」學友謂過去1年頻撲到世界各地演出，他與家人尤其女兒都經常互相掛念。
學友尾站巡迴個唱暫定5場，問到會否再加場？他說：「𠵱家應該唔可以再加，因為我新年前一定要完。」問到其聲線保養可有問題？學友謂：「呢排我走埠都係3場3場咁唱，應該冇問題，香港多啲場數係最大壓力。」至於在新場地演出，學友謂他尚未到場館綵排，但並不緊張，他說：「我做咗幾十個城市，適應到嘅，天氣同各樣嘢唔同都OK，新場地要主辦單位適應啲規例，我唔擔心。」
另一方面，提到近日各大樂壇頒獎禮陸續舉行，歌手及唱片公司得不到想要的獎項便玩杯葛的情況今年特別嚴重，學友說：「年年都係咁，我做呢行咁耐，近呢十年成日發生，見慣不怪，自己作為歌手就盡量支持啦，𠵱家個氣氛對成件事都唔好，各顧各咁做，大家用唔同標準、準則去衡量，其實有好音樂、受歡迎嘅歌就得啦，𠵱家分散晒，好冇滙聚嘅功能。」
評頒獎禮
稱消極抵抗冇好結果
學友很久以前已大力贊成每年只舉行一個樂壇頒獎禮，他昨日說：「講咗好耐，咪出咗個四台聯頒放喺唔重要嘅位囉，大家只着重本身嘅頒獎禮，好似應酬咁，冇乜好評論啦。」問學友是否很失望？他說：「失望咗好耐，唔只我一個人，好多關心香港樂壇嘅人同鍾意聽音樂嘅人都失望咗一輪，市場唔好就應該趁呢個時刻改變吓。」會否身體力行去帶動？學友說：「我可以做啲乜嘢？可以做嘅都做晒，後輩新人出嚟唔可以做，我做咗（缺席參與）都冇乜好結果，我以消極嘅態度做咗自己嘅決定，改變唔到啲乜嘢。」
此外，學友經理人陳淑芬表示打算於今年4月1日，在紅館舉行1場紀念張國榮（哥哥）逝世5周年音樂會，找來哥哥生前的好友演出，學友則擔任藝術總監，陳淑芬說：「會將所有賺嘅錢放晒喺製作上，有剩先會捐出去。」
採訪、攝影：駱華齡、藍文浩
最高蘋嬸
我蘋嬸建議學友利用休息呢1年時間，喺屋企多啲唱歌畀班印傭聽，建立融洽嘅勞資關係，實行威畀啲菲傭睇。
蘋果娛樂特派評述員蘋嬸
話你知：歌聲響遍全球
張學友去年2月18日在美國拉斯維加斯（圖），為其橫跨近一年的世界巡迴演唱會揭開序幕，其後再到加拿大、澳門、日本、台灣（小圖）、新加坡、印尼、香港、馬來西亞、澳洲及內地多個地方如北京、上海、長沙和廣州等地開騷，幾乎有華人聚居的地方，都能聽見學友的歌聲。演唱會在各地均掀起撲飛熱潮，且出現門票供不應求的情況，故學友一再加場，連計即將在香港舉行的尾場演唱會，總共舉行了104場演唱會。
娛樂資料庫：開騷喪父惹僱傭紛爭
張學友走遍東西南北，於一年內舉行104場演唱會，確實是一項壯舉，可惜演唱會自去年2月揭幕便是非不斷，更曾因身體不適而取消演出。
日期：去年2月
簡介：學友的父親張作琪患病離世，學友當日已飛往拉斯維加斯準備開騷，惟有強忍悲痛完成演出，完騷後即返港為父親低調舉殯。
日期：4月
簡介：有網友不滿學友於7月舉行的台灣個唱門票太貴（約1,884港元一張），發動網上抗議，兼向台灣的消費者保護委員會投訴。
日期：8月
簡介：學友於香港舉行的演唱會，部份座位門票被當作T恤禮品包的贈券，禮品包以1,180元發售，被指等同變相加價。
日期：9月
簡介：學友因喉嚨不適而宣佈取消香港站的最尾兩場演唱會，引來部份特地來港睇騷的內地fans不滿。（圖）
日期：9月
簡介：傳學友與妻子羅美薇因過去3年更換了21名菲傭，而被菲律賓駐港總領事館列入僱請菲傭黑名單。
日期：10月
簡介：學友原定於新西蘭的奧克蘭開騷，卻因當地主辦單位突然在開騷前一日宣佈演出工程許可證未能如期批核，被迫取消演出。
資料來源：《蘋果》資料室
率直小八卦：明剃無綫眼眉
打算休息1年的學友，多年前已沒跟無綫簽歌星合約，也毫無顧忌地以廣東話接受有線電視訪問，昨日他談到08年會將大部份時間用來留在家思考及看奧運時，無綫《東張西望》主持林映輝（圖）即說：「睇奧運記得睇無綫喎！」學友聞言即看了面前的有線娛樂新聞台咪牌一眼，隨即不畀面兼面露尷尬之色說：「我會個個台都擰吓，咁講好難做嗰喎。」
