巴西球星卡卡08年霸氣大激爆，呢位AC中場表示希望成為球隊隊長，又話打英超球隊「Easy執」！佢究竟係咪喺杜拜集訓見到海市蜃樓，於是幻想自己係沙漠梟雄呢？
要做AC隊長喎
我求大俠先嚟解第1座「蜃樓」。大家都知AC隊長馬甸尼夏天榮休，第2、3隊長分別係岩布仙尼同加度素，卡卡自己都話：「我講吓啫，一切要按資歷排，我排到好後。」不過，就嚟3張嘢嘅加度素唔係將材，岩布仙尼又唔係正選，卡卡到時要打尖邊個敢出聲呀？
至於英超球隊「Easy執」更加唔係蜃樓。卡卡話上季歐聯擊敗利物浦同曼聯都幾輕鬆，所以2月對阿仙奴深信球隊可以晉級，「不過阿仙奴係強隊，我哋要小心應付。」講得咁有頭有尾，我求大俠斷定卡卡絕對唔係對住沙漠發夢，而係充滿自信嘅表現。
英超隊？「Easy執」！
我求大俠一向嫌卡卡太內斂，可能同同鄉朗拿度、朗拿甸奴太威水有關啦！不過呢位書生舊年掃晒所有先生獎盃後，跟手搣一搣自己塊面痛到「啊」一聲，先發現自己已貴為世界頭號球星。以佢咁嘅地位話英超球隊「Easy執」，相信英超迷都唔會發爛渣啦。
又難怪卡卡佢咁意氣風發，巴西同鄉柏圖加盟後多個進攻拍檔，朗拿度喺杜拜表現亦不俗，5日操練以來有兩日有波入，教練肥安都笑到見牙唔見眼。相信AC嚟緊下半季入球會分散啲，對手今次頭痕喇！不過卡卡咁高調始終唔係咁好，阿仙奴聽到後肯定士氣爆燈。其實，佢應該留番啖氣安撫廸達就真，呢位門將周日參加30分鐘訓練賽連失6球，對手青年軍門將居然保持清白之軀，如果再冇改善，卡卡嚟緊想有運行都幾難！