孫柏文喺花旗國讀大學時，察覺到一個怪現象。就係一個星期裏面，最多人去酒吧嘅一晚係禮拜四。可能因為周末比較多人，自己喺屋企搞party，所以酒吧最旺係禮拜四。因為酒吧唔同人哋屋企，唔會飲到冇，所以好多時禮拜四係一周七日中酒精攝取量最高嘅一日。
周五開班博人走堂
根據《華爾街日報》，某大學因為見到呢個情況，所以推行新措施。大幅提高星期五開班嘅數目。以我對花旗國大學文化嘅認識，呢個措施嘅唯一效果只會推高「走堂」人數。
今日，我想回應隔籬理財版《敏妮Talk》嘅溫敏妮。前日，溫敏妮寫咗篇題為「投機+風險=機會」嘅文章。文中，溫小姐話佢嘅朋友光頭仔，留意緊會令孫柏文唱歌嘅阿里巴巴（1688）。溫小姐估話，應該唔係因乜嘢基本因素，光頭仔只係體驗緊《信報》曹sir所講嘅「有智慧，不如趁勢」。為咗個「炒」字。
機會-風險=套戥
大家作為《金手指》嘅fan屎，都應該知道我對阿里巴巴嘅睇法。所以今日嘅回應唔係想講阿里巴巴。今日，我係想講篇文嘅重心，「投機+風險=機會」呢個方程式。
大家都知我數口比較差，得小學程度。不過以小學嘅算術嚟睇，如果「投機+風險=機會」，即係「投機=機會-風險」。不過我又諗，「機會-風險」即係一個冇風險嘅賺錢機會。冇風險嘅賺錢機會，唔係「套戥arbitrage」咩？點會係「投機」呢？
平時，我會盡量避免用我啲小學程度嘅數學，去糾正啲港女，特別係從事金融業嗰啲，分分鐘除隻高踭鞋去打爆你個頭。不過溫小姐就唔同，EQ高、人品好，永遠唔會破口大罵。如果所有喺工作上有下屬嘅港女，學到溫小姐嘅三成功力，「港女」呢個字，都唔咁負面。
真係想約溫小姐去飲咖啡。
金手指網誌： http://phatdat.blogspot.com