大陸08年第一個禮拜，畀隻「烤鴨」出盡風頭，咁港股又點呢？
上個禮拜，表現最理想嘅股票係邱德根揸fit嘅遠東控股（036），港股08年首日開市，遠東控股就勁升四成四，當日仲中途停牌至今，公司之後發表通告，話因為涉及一項須予披露嘅交易，同埋發行新股。
黃國英一唱即中
跟隨其後嘅係金融服務股華富國際（952），舊年股市勁旺，華富業績當然睇高一線，股評人黃國英之前亦推介此股，話係08年重點心水股。黃國英唔少粉絲，今次佢一唱即中，喺網上討論區就有唔少網友大讚，網友無煮值就話：「買定冇衰，等升幾個開。」華富今年首個交易日，急升兩成九，之後越升越有，上周累升四成一。
至於表現第三嘅就係從事證券買賣、融資同物業投資嘅民豐控股（279），上周股價急漲近四成，但華華睇番，呢間公司9月底止嘅中期業績，虧損擴大至1.25億銀，盈利跌股價升，真神奇。近幾星期金價急升，恒豐金業（870）最受惠，股價進賬唔少，勁升39%，主席林世榮仲心郁郁，趁金價創新高，賣緊啲黃金擺設。另穩守第五位係冷門股新利軟件（8076），從事軟件開發，上周股價升三成二。
08年打響頭炮股票
‧上市公司：遠東控股（036） 上周表現：+44.0%
‧上市公司：華富國際（952） 上周表現：+41.1%
‧上市公司：民豐控股（279） 上周表現：+39.5%
‧上市公司：恒豐金業（870） 上周表現：+39.4%
‧上市公司：新利軟件（8076） 上周表現：+32.2%
資料來源：彭博