香港人鄭威濤前日在日本東京築地老牌魚市場擊敗一眾地頭蟲，以43萬港元投得傳說中可帶來好運的「日本一」藍鰭吞拿魚，為港人在日本寫下歷史性一頁。徐淑敏前日除有機會親睹競投過程外，更有幸親嚐「日本一」的第一口魚生，甚至食勻全身，她大讚：「入口即溶。」難怪她全程食到嘴舐舐，心情high到震。 東京直擊
香港時間前日凌晨約2時，徐淑敏（Suki）隨無綫節目《和味無窮》大隊，出發到東京築地老牌魚市場採訪日本新年後魚市場首個交易日，她抵達後先後參觀冰鮮魚場及急凍魚場，雖然天氣十分寒冷，凍得她牙關打震，加上前一晚又通宵拍劇，身心極為疲累，但親眼目睹一排排放置地上的巨魚時，Suki即疲勞盡消，好奇地四處參觀。
按日本傳統，每年魚市場首個交易日都會拍賣一條最貴及最靚的魚王，並稱之為「日本一」，拍賣會於前日清晨約6時開始，經過連番熱烈競投下，結果由Suki的《和味無窮》拍檔兼板前壽司老闆鄭威濤（Ricky），以607萬日圓（約43萬港元）投得重276公斤（約607磅）的「日本一」藍鰭吞拿魚，成為首位港人投得這條傳說中可帶來好運的福魚。
大讚新鮮
「一入口即溶冇腥味」
拍賣結束後，Suki即上前恭賀Ricky，甚至伸手撫摸魚王身體，至上午約10時，Suki與大隊前往Ricky於東京赤坂開設的板前壽司店，親睹劏魚儀式，不過由於魚王重達600多磅，要出動10名工作人員始能把魚王搬入店舖內，認真誇張。
魚王的出現，吸引不少途人圍觀拍照，而現場早有三位戴上「日本一」頭帶的師傅候駕，三人先用鋸把魚頭魚尾切去，再陸續切割魚面及魚身部份，其間師傅首先把魚王最名貴的魚面部份切片製成壽司讓Suki及Ricky品嚐，有機會品嚐第一口魚王的Suki，興奮地拿着壽司放入口，並閉起雙眼食得十分滋味。問Suki這第一口感覺如何？她笑說：「一入口即溶，好新鮮，完全冇腥味，就算唔點豉油都咁好味。我一向好鍾意食魚生，但咁大個女從來未試過食咁新鮮同咁好味嘅魚生，而且亦未試過食得咁豪，計計埋埋，呢一餐我食咗成30,000幾日圓（約2,200港元）㗎啦。」
口福滿瀉
啖清酒魚眼炸魚唇
除有幸品嚐第一口魚王外，Suki更食勻魚王全身，包括用清酒汁煮的魚眼、串燒魚頸、各式拖羅及炸魚唇等，認真有口福。Suki說：「Ricky今次投到呢條日本一，我都戥佢開心，有份參與今次新年拍賣，我都覺得好開心同好榮幸，估唔到個魚市場係咁大，其實前一晚我通宵拍劇冇瞓，喺飛機同搭車嗰陣全程大昏迷，噚晚嚟到日本之後，我連晚飯都冇食到就上床瞓，唞足精神今日嚟見識，真係大開眼界。」
此外，Ricky透露他已訂購一條跟「日本一」同樣大的吞拿魚返港，並在明日《和味無窮》的記者會中進行劏魚儀式。
採訪、攝影：何永寧
話你知：魚王全身可食用
-魚頸-
多以串燒方式煮食，入口鬆化，一碟售價約4000日圓（約290港元）。肉質特甜，油脂也很豐富。
-魚眼-
以清酒汁煮，膠質豐富，煮熟後呈啫喱狀，一對魚眼約售9,000日圓（約650港元）。含豐富DHA。
-魚面珠-
藍鰭吞拿最名貴部份，如今次「日本一」的魚面重約300克，切成魚生的話每碟約售7,000日圓（約500港元），除可製成魚生外，也可灼燒。魚面肉脂肪較魚頭肉高，肉質甘香。
-大拖羅-
每件售價約1500日圓（約110港元），油分較中拖羅多，分「蛇腹」及「霜降」兩部份。前者的白色魚筋較粗，油分較多，但魚味較淡。後者少筋，雪花紋較中拖羅多，卻較蛇腹少，魚味也介乎兩者之間。
-中拖羅-
每件售價約1000日圓（約70港元），魚腩的上段位置，少筋，但最有魚味。
-普通拖羅-
每件售價約600日圓（約43港元）。
