參選港島立法會補選落敗嘅葉劉淑儀，選舉過後就冇乜特別搞作，佢最近就喺有線娛樂台嘅《肥媽私房菜》做政界女強人系列打頭陣嘅嘉賓。節目今晚7點至播，據知，葉劉喺節目中，跟住肥媽齊齊行街市，唔知係扮嘢定真係平時少去買餸，葉劉對街市裏面嘅事物都表現得好好奇，變成每事問，最後買咗一條䱽魚，整咗一道薑葱煎䱽魚。
「陳太好夠福份」
葉劉又講到，年輕時因為側重事業，廚藝麻麻；講到人生之道，就係簡簡單單，輕描淡寫同開心就夠。葉劉一向EQ唔高，冇嘢時有講有笑，樣子儀態絕冇問題，不過一俾人辣襯就即刻露底，嗰種尖酸刻薄全部出番晒嚟。
話說主持人肥媽喺節目中提到，早前兩太爭奪立會補選議席，成為全城話題，問佢同陳太有乜共通點。葉劉開始講時仲有板有眼，話陳太廚藝比佢好得多，以前仲食過陳太煮嘅洋葱鴨，整得好好味喎，但跟住講到兩人比較就嚟料，「陳太好夠福份，有丈夫、兄弟同好多子姪，不過上天好公道，我親人少但係同事多，工作上有好多男性可以幫到我。」
睇嚟葉劉一聽到「陳太」兩個字就會自動辣㷫，嘩！呢幾句說話包住嗰條刺，隨時長到喺䱽魚身上都未必搵到。