港澳辦副主任張曉明講功能團體,話功能團體有功勞,「功不可沒」!立法會內之功能團體對本港GDP之貢獻,高達90%。聽張先生嘅意思,將來功能團體議席不可以廢除。但人大常委會議明明話,立法會議員可以實行全面普選,人大常委應該大過張曉明啩?如有功能團體議席,何來「全面普選」?唔通張曉明嘅意思係,仍然保留功能團體議席,但選舉並非一公司一票,而係所有從業員一人一票,好似會計界由所有會計師投票選出咁樣?
咁深奧嘅安排,左丁山唔識諗,總之唔曉唔明。張先生講及之「功不可沒」,乃奇怪邏輯,假如對GDP貢獻多,就有資格在立法會佔議席嘅話,滙豐銀行與恒生銀行,長實與和黃港燈等等大公司,應該有議席分配噃,中環應有好多席㖭,天水圍唔應該有議席?講落去又係好深奧嘅問題,左丁山唔曉唔明。
人大話二○一七年「可以實行」行政長官普選,內中有玄機。嗱,二○一二年沿用現在辦法選特首,必定挑選出一位中央認識嘅愛國愛港人士,當今政壇紅人如唐司長、梁召集人,新的葉太,以至曾局長等等都有資格競逐,是但邊一位選出嚟都好,做滿五年後到咗二○一七年,在任特首參加直選,佔盡先天優勢,民主派有邊位可以挑戰呀?如果二○一二年就直選特首,民主派仍然可以搵到人;到二○一七喎,李柱銘、陳方安生一輩,七十幾八十歲咯,何俊仁、甘乃威等都六十幾啦,只有梁家傑勉可一戰。
所以咯喎,現在四十五歲左右,五十歲以下嘅政治人物先至會有前途,民主派如接班無人,到二○一七年、二○二○年,啲僅存老將會有「廉頗老矣,尚能飯否」之嘆,楊森等同輩人物,不如今年就退下來,讓位畀新人。民建聯就唔同呢,啱啱裝修萬幾呎辦公室,設備齊全,周圍招攬二十幾歲大學畢業生,外圍統戰專業(所謂獨立)人士,就係為咗十三年後備戰。民主派無銀無人無組織,遇上中共打持久戰,危矣。與陳淑莊同年齡一輩,會陸續加入民主派乎?