公民黨梁家傑參選特首同煲呔拗手瓜之後，到𠵱家都時不時喺網頁上發表《傑哥家書》，同經常喺港台發表《香港家書》嘅煲呔分庭抗禮。
傑哥噚日咁啱同煲呔同日發表家書，都係講政制發展，煲呔叫香港人「咪搞嘢，聽阿爺話」。傑哥身為大狀，就用理性分析，講到早喺17年前頒佈《基本法》時，北大人已經向香港人描繪過普選願景，但冇兌現，𠵱家喬曉陽同煲呔口講嘅2017、2020普選，港人前後要等成30年。傑哥提醒大家嘅係：當年講普選願景嘅中央領導好似姬鵬飛咁，已不在人世，將來如果普選又搞唔到，香港人亦好難搵番呢啲出口術嘅人算賬。心水清嘅大家，認為煲呔抑或傑哥有道理呢？