同嫲嫲關係一直唔親密，細個睇住佢拖住阿哥細佬嘅手返學，自己跟住後面覺得好孤獨。有三姑六婆同6、7歲嘅我講：「你出世後屋企環境差咗，人哋話你腳頭唔好囉。」
每逢農曆年都諗起嫲嫲，因為佢鍾意新年後用四季桔浸柑桔水，先喺玻璃樽鋪層鹽再放桔，然後再鋪鹽埋住啲桔，最後閂蓋；鹽溶咗變水後發現啲桔露出水面，就再放鹽埋住佢，如是者，直至鹽水完全浸過啲桔。
大個咗成日試浸柑桔水，但每次啲桔都發霉。前日去新界林錦公路買桔，強記花園老闆李永強醒我一個秘訣，唔好就咁用手搣啲桔落嚟，好易搣爛桔皮，桔肉暴露空氣中易氧化發霉。要用鉸剪剪，就唔會整爛啲桔皮；洗亁淨然後風亁四日，之後先放入樽就唔會發霉。佢仲話唔好用噴過有害農藥嘅桔：「最好向相熟嘅花農買桔。」
諗番轉頭，只係自己細個太倔強，一言九「頂」，又唔識𠱁老人家開心；終於有信心浸到靚嘅柑桔水，可惜阿嫲早已經走咗，品嚐唔到。
逢周一至周四刊出