黎姿及葉翠翠前日在深圳為一間美容院剪綵，身穿吊帶裙的黎姿雖清麗脫俗，但卻不及以一條藍色deepV露背裙亮相的葉翠翠搶鏡。黎姿表示自己今年會主力打理弟弟黎嬰的美容生意，也會接廣告及代言人的工作，但並不是如外間所指的退出娛樂圈。
黎姿、葉翠翠及黃長興、黃長發兩兄弟前日往深圳擔任一美容旗艦店的剪綵嘉賓，黎姿及翠翠都悉心打扮，黎姿身穿一條白色Valentino的吊帶裙，翠翠則最性感，以一條藍色deepV露背裙出席。
怕接商場騷
前日現場有不少圍觀人士，幸好未有造成混亂，黎姿表示自己甚少接商場騷，因為怕控制不到突發場面，她說：「我試過喺內地登台時，有fans衝上台，好彩最終有保安控制場面，自己好怕擔驚受怕，所以多多錢都唔做，單係推呢啲剪綵工作，都有成七位數字。」
提到早前曾揚言今年會主力打理弟弟黎嬰美容生意，有傳黎姿會放棄演藝事業，黎姿前日澄清說：「唔係唔做，大家誤會，係會做代言人同接拍廣告等。」這類工作大都是上岸女星的工作範疇，問她是否嫌拍劇辛苦，黎姿續謂：「唔係上岸，係太多嘢做，兼顧唔嚟，因為要擺多啲時間照顧細佬生意，𠵱家都請咗1男1女醫生，但唔代表我退出娛樂圈。」
弟住療養院
問到其弟現時狀況，黎姿稱：「佢𠵱家住療養院，已經識扶住嘢企起身，佢進步好好，可以講一啲簡單嘅單字，溝通冇問題，有時我用一啲專業美容知識考佢，佢都好有反應，佢記憶力冇喪失。」
另外，葉翠翠謂未參選港姐時已認識擔任剪綵的美容店老闆娘，有指美容院有贊助她，翠翠謂：「如果要着泳衣，之前會好勤力去做身體護理，冇贊助就會揀啲最平去做，有贊助就會揀最靚嗰啲。」問她為何如此慳家，她說：「𠵱家要租樓、畀家用都用晒成份人工，加上爸爸已退休，自己成為屋企經濟支柱，所以都有買啲藍籌股票去賺錢。」
採訪、攝影：曾小嘉