為咗爭取早日落實雙普選，民主派兩大龍頭民主黨同公民黨出盡法寶。有「民主黨劉德華」之稱嘅林子健，噚日就搵埋曾經監製網上熱爆歌曲《福佳始終有你》嘅Freeman，聯同一班年輕人、泛民立法會議員，製作一段改編自中國奧運主題曲，名為《2012Weareready》嘅短片，最快聽日會放上YouTube畀網民欣賞。
多咗年輕人參與
早前為爭普選而絕食100小時嘅林子健話，為首歌填詞用咗幾粒鐘。佢位拍檔Freeman就話，人大否決2012雙普選後，即時激發唔少年輕人參加今次製作，佢又話聽到煲呔前日指爭取普選唔可以好似「嘟」八達通嘅講法，好激氣，「其實佢最有責任幫港人嘟呢張八達通，可惜佢連張卡都唔敢拎出嚟。」
民主黨李永達同單仲偕噚日都有去唱埋一份，李永達話，中學參加合唱團時曾被人踢出局，所以噚日都係做吓陪襯。而公民黨亦唔執輸，噚日喺旺角鬧市搞政改論壇時，出動埋該黨一隻幸運狗仔吉祥物，成功吸引唔少途人參加論壇。