人稱C.F嘅資深保險賓架──滙豐保險集團（亞太）行政總裁蔡中虎，原來去年除夕夜，已經正式榮休，銀行內部亦公佈咗。喺獅子行服務25載嘅C.F，可以話係一手建立滙豐香港銀保業務（bancassurance）嘅功臣，今時今日滙豐保險高踞本港市場三甲位置，強積金業務又獨領風騷，內地合資保險公司，舊年底又簽埋協議，今次榮休，佢老哥可以話係功成身退。
本港保險發展史，可追溯至70年代，蔡中虎有次同華華食飯，回顧獅子行過去廿幾年嚟嘅銀保業辛酸史，佢話最大功勞要數集團前大班龐約翰，但講到同自己最有緣嘅，就係現任大班葛霖，事關兩人都係82年加盟滙豐，當時葛霖負責本港總部企業策劃，C.F就隸屬環球保險總部香港辦事處，佢仲記得第一個job，就係拍住葛霖，點樣將當時蝕本嘅保險業務變為賺錢。
提攜後輩 為人親和
身兼滙豐銀行保險業務主管嘅蔡中虎，其實自06年10月起，已專注大陸市場拓展，重點喺搞掂內地檔合資公司，亞太區業務就交由湯德信主管，完成接棒過程。
一向跟傳媒關係良好嘅C.F，據行內賓架講，佢好鍾意提攜同關照後輩，為人亦相當親和。華華喺度祝願佢老哥榮休後，逍遙快活，身心康泰。