巨胃小情人越擦越合拍<br>杏兒咀宗澤:愛我多啲啦

巨胃小情人越擦越合拍
杏兒咀宗澤:愛我多啲啦

胡杏兒對黃宗澤說:「Kiss都好似冇乜感覺咁,你愛我多啲啦!」
這對緋聞男女,05年合演《我的野蠻奶奶》時傳撻着,其後分分合合,去年再度合演《野蠻奶奶大戰戈師奶》感情歸位,玩盡愛恨交煎,胡杏兒嫌黃宗澤拍茄輪戲不夠激,鬼馬導演推波助瀾,任由他們咀個夠本,死不嗌cut,益全廠人員睇好戲。
黃宗澤拍戲當正杏兒是老婆,杏兒則愛聽他的甜言蜜語,合拍到暈。
更有趣的是,原來他們早於03年拍《衝上雲霄》時,因大食共同嗜好結緣,此後不時殺入餐廳嘆九大簋,飛車片去超市掃貨……
隱藏5年的真正撻着謎團,今日終極揭開。
撰文:朱倬誼

胡杏兒和黃宗澤的緋聞傳了3年,他們異口同聲直認:「喺TVB中,佢係我最好、最傾得埋嘅異性。」兩口子同樣愛吃、性格合拍、工作又有默契,話匣子一開就是滔滔不盡,緋聞男女互chat,互笑互窒,娛樂無窮!

杏:胡杏兒 澤:黃宗澤

-覓食 牛魔王遇扒妹-

杏:我哋好鍾意食嘢,有次我哋去中環食飯,佢成塊扒食晒,係超大塊嗰隻。
澤:你有份食呀。
杏:我冇乜食呀,你咁大塊食晒,仲想食埋我嗰塊㖭呀。佢好擦得,但我食量都好多。
澤:基本上,我嘅食量同有啲人差唔多……
杏:我冇成份扒隊晒喎,佢淨係食好嘢㗎咋!
澤:就算我去canteen食碟頭飯,都要炒碟菜,阿姐(汪明荃)又成日煮飯請我哋食,四餸一湯㗎。

二人嘆九餸

杏:有排骨、蒸肉餅、矮瓜、豉油雞、花膠湯,成日唔同餸。
澤:食到我肥晒啦。
杏:其實我哋拍《衝上雲霄》時,已經有食嘢嘅緣份。
澤:喪㗎!自從嗰一戰之後,佢知我擦得,我又知佢擦得。
杏:為咗食係不惜一切。
澤:嗰次我哋去札幌拍《衝上雲霄》外景,喺酒店食早餐,跟住要拍訪問,拍緊德哥(監製潘嘉德)時,我哋未使拍住,突然間,你眼望我眼,肚餓!點算?不如搵嘢食啦,咁大家都想食鹹嘢,同埋凍凍哋,想買暖嘢食,跟住見到拉麵舖,就蓬一聲走入去!
杏:我哋急步行去拉麵舖,嗌咗一碗,但大家覺得:都係唔好!嗌多碗。
澤:一人一碗,5分鐘隊晒,前後步程連埋食15分鐘都冇!到合作拍《我的野蠻奶奶》,兩兜友,嘩,真係頂你個肺,放食飯時去將軍澳日本餐廳食嘢,嗌咗9個餸呀!
杏:咖喱豬扒飯、雜錦刺身、天婦羅、海膽一板、蠔……
澤:仲打包㖭,你諗吓幾恐怖。

5年前在日本札幌拍攝《衝上雲霄》時,胡杏兒和黃宗澤(箭嘴示)已秘密展開美味情緣。 資料圖片

共用零食箱

杏:我哋又經常去清水灣嘅百佳掃貨。
澤:喺公司服裝間,我哋有個大膠箱放零食,冇乜存貨,兩個人就即刻飛車,推車零食返嚟,塞滿個箱,一定糧草充足。其實零食佢勁啲,係keep住食嗰隻,即係明明話好飽,點知轉頭仲食緊,正餐就我勁啲。
杏:我哋拍食飯戲時用嘅牛扒、雞扒,都梗會聽到有人叫「Bosco,唔好食咁多住!」
澤:我係牛魔王,但我哋食量係一樣,佢女仔中算犀利!

-拍檔 一鬆一緊互補-

澤:開頭拍劇佢好擔心、好緊張,驚誇張,又驚俾人話做得唔好,有幾場戲佢太混亂,搞唔清楚點算好,所以我哋拍咗當熱身,第二日再拍過。
杏:因為喜劇做咗好多,唔想重複做法,加上係續集,其實唔止我擔心,你都好緊張啫!大家都要求高咗。
澤:係,唔可以衰,我好驚觀眾心諗會係好搞笑,但呢套係時裝,要生活啲,唔可以古裝咁爆笑、咁騎呢。話時話,杏兒工作態度係好,只係有時過份緊張。
杏:你又過份放鬆啫。
澤:我係應該放鬆就放鬆,你一日24小時都作戰狀態。
杏:你唔緊張,好多嘢會遺忘,呢場戲做錯咗連唔到下場,係成日備戰狀態。
澤:我好鬆咩?
杏:咁你話我緊,我咪話你鬆囉,互動嘛!
澤:杏兒工作態度非常熱誠、有衝勁、有heart,可惜keep住打緊仗,搞到精神緊張,佢會感染對手認真,我一踏入公司已經作戰,要同你死過,但行出公司、放咗工就放鬆啲啦。

女版周星馳

杏:我工作狂嘛,佢都話我太緊張,佢需要一個relax嘅,同佢撲蝶、同佢去玩。
澤:我之前都工作狂㗎,不過當你幾年不停拍,就一定要畀時間去吸收,唔係個人有output冇input,會亁㗎。
澤:兩年前我覺得佢拍戲乜都夠膽死,污糟邋遢、肉肉酸酸全部夠膽做,我都話過佢似女版周星馳。
杏:我邊有周星馳咁叻!
澤:梗係,咁講啫。
杏:佢27億身家呀,我非常當之有愧。
澤:但佢好肯做,可以乜都丟低,呢樣我好欣賞佢;兩年後佢呢樣仲係度,但感覺上攰咗少少。

化妝:ZoeFan@BeautyTech
服裝:DKNY(胡杏兒)/CK(黃宗澤)
髮型:KelFung@DoubleH
場地:SpassoItalianbar&restaurant@TST

黃宗澤和胡杏兒並頭依偎,眼神盡是甜蜜柔情。 攝影:林德雄

黃宗澤拖着胡杏兒共舞時,開心笑容真情流露。

愛的獨白

胡杏兒:Bosco低B又樂觀

杏:我要喺戲中鍾意嗰個人,要有感覺,拍戲嘅時候,都enjoy同Bosco(黃宗澤)「挨挨笨笨」、甜言蜜語。
鄭秀文做過一個訪問,佢話每個女仔去到唔同階段有唔同需要。我同之前個男友拍拖4年,佢對我好好,唔係唔鍾意佢,係去到一啲位,大家溝通唔到、維繫唔到,經過4年咁長時間,係會對愛情有啲恐懼,我做呢行,好多變數,要睇定啲先。

多狂蜂浪蝶

Bosco好識照顧女仔,女仔會好鍾意佢,佢好多狂蜂浪蝶,我就實際啲,呢樣冇佢咁多啩?男朋友嘅年紀最好唔好細過我啦,思想成熟啲我比較重要,Bosco有啲思想低B,佢又好樂觀,係有時對問題睇輕咗。拍戲完咗,大家真係冇,佢都唔當我係女仔,只係好朋友。
我鍾意嘅男朋友係可以照顧我,年紀大少少,識體諒人,有好穩重、好靠山嘅感覺,但唔係富豪呀吓,我唔可以再玩玩吓,要諗將來,拍拖都希望有結果。

黃宗澤:杏兒惡得有道理

澤:杏兒惡起上嚟唔少嘢,但惡得有道理,唔係亂嚟,佢性格比我硬淨,我腍啲、就人多啲,但咁係好㗎,如果兩個都咁硬淨,死啦,實嗌交!兩個腍又變咗冇意見,我哋相處、拍劇時,我會提吓佢,佢又會話吓我,有時拍戲未到我,我都會入廠睇佢拍嘢,話佢頭先點做好似得意啲喎,大家互相提點。

「唔使負責任」

我唔怕傳緋聞,都習慣咗睇古仔,全部都係傳媒寫,分手、同居、嗌交,第三者、四角關係,笑吓囉。其實拍戲嘅時候,係有啲動情,會好投入角色,拍緊咪當老婆,大家平常相處都OK,拍嘅時候易投入啲,拍完拍吓籮柚走㗎啦,所以拍戲有呢樣好,畀個機會你拍拖,但又唔使負責任,但戲一完,又唔係嗰種感覺,同佢太過老死,往後唔敢講啦,唔可以百分百肯定唔拍拖,可能他朝有日覺得呢個人好正,老土啲講,呢啲係緣份,或者無端端撻着,timing問題啦。

《野蠻奶奶》之最

無綫新劇《野蠻奶奶大戰戈師奶》收視高開,首集播出的最高收視獲227萬觀眾收看,走勢凌厲,組情侶檔的黃宗澤和胡杏兒奉旨拍拖又奉旨鬥氣,過程有笑有淚,激情激咀激氣有齊,男女主角更有筍戲推介:

汪明荃(中)和胡杏兒(左)在《野蠻奶奶大戰戈師奶》中鬥法,令黃宗澤頭大如斗。 劇照

最激情 一咀再咀

杏:係激情又激氣,kiss嗰場戲錫咗好多次。
澤:我表現僅僅及格,因為我連續飛咗好多個鐘,喺美國飛返香港,一落機即刻入廠拍,所以好攰。
杏:kiss都好似冇乜感覺咁。你愛我多啲啦,你愛我啦!我哋都好有要求㗎。
澤:當時我都拍到好𤷪𤺧,要行出廠唞一唞。
杏:NG3、4次呀,好尷尬,最尾嗰次仲要俾工作人員笑,死人導演又唔嗌cut。
澤:last仲係咁錫緊吖嘛!

最甜蜜 送比堅尼

杏:有場我暗示想同佢生BB,講我覺得Bosco唔陪我,為咗令佢唔好咁專注工作,幫佢生個仔啦,於是我畀個手機佢,睇我舅父個仔嘅BB相,好生活但幾sweet。
澤:另外一場講我去完外國返嚟,買咗套比堅尼畀杏兒做手信,低低能能,好孩子氣,𠱁佢着件比堅尼喺面,佢問我有冇撩女仔、撩空姐?俾女媾呀?睇番playback都幾好笑。

最傷心 搭上秀惠

杏:Bosco戲中初戀情人係楊秀惠(右),我覺得比唔上佢,佢好叻,我好粗魯,陀槍師姐咁,佢就一心撬牆腳,有場戲講Bosco上咗佢度,同楊秀惠激咀。
澤:但楊秀惠當晚就踩上門,特登講出嚟激佢。
杏:嘩!嗰場戲拍到我心臟病發咁滯,楊秀惠做得好好,好有feel!
澤:係嗌到我耳膜都穿呀!