近期港股波動，唔少散戶失手坐艇，網友Omygod喺《香港討論區》度呻，但唔係呻炒股點中伏噃，佢話：「女友叫我放晒啲股票，唔係就分手喎，佢投訴我沉迷炒股，錢又賺唔得幾多，成日提心吊膽，驚個市跌，搞到人都瘦埋，冇晒精神，前日佢同我講，佢唔鍾意賭仔，話嫁畀賭仔冇幸福，家陣我就十足賭仔一樣，如果我再炒股就分手。」
其他網友都好同情佢，Ryanbow話：「佢都係為你好啫，可能女人直覺股市大跌當前，叫你沽貨走人，真係醒目女。」但Dream_sta就話：「老婆都係咁話，何況女友，都未結婚就管住晒，結咗婚你仲有碇企。」
網友獻計長線投資
Huso另有見解：「佢唔係唔想你玩股票，係嫌你賺得少，覺得你冇用。其實唔使分手，只要你賺得多，佢自然投懷送抱，使乜煩啫。」Leewingkin同意話：「佢話緊你冇用，賺得唔多，你試吓賺到，分番啲畀佢，佢嘅反應一定唔同晒。」
亦有啲網友提供更有建設嘅方法，Tcl-sky話：「如果你買股票係放長線，唔使日日昅實股價，咁你女友咪唔知囉。」Cklung1980y亦獻計：「咁煩又賺唔到錢，倒不如買基金啦。」股壇狂牛指：「好似股神畢菲特咁，講長線投資，呢啲先至係最好嘅玩股票方法。」