如果唔係民主黨王德全同前民協成員甄啓榮倒戈，民協嘅譚國僑上星期仲可以同委任議員陳東抽籤分勝負，有機會連任深水埗區議會主席，唔使眼白白將做咗10年嘅主席一職送畀陳東。民協前主席馮檢基（KK）噚日喺商台節目翻王德全舊賬，炮轟對方指控民協大蝦細係嚴重失實，仲暗示王德全反轉豬肚。
點解咁講？03年新一屆區議會成立，KK邀請王德全做副主席，對方唔肯，先由佢哋嘅梁欐頂上。轉過頭王德全話要做兩個小組委員會主席，民協瞓身支持，點會係王德全口中嘅「突然熱情」？可惜好心冇好報，KK話王德全喺今屆區選違反泛民協定，支持硬撼民協嘅候選人，其後仲唔投票畀譚國僑，兩次違規令民協非常激氣，所以已去信民主黨要求交代，否則以後要做friend肯定難好多。