TVB的高清重頭劇《野蠻奶奶大戰戈師奶》一播出已經有35點收視，犀利！主題曲仲搵埋當時得令的農夫同Lisa姐合唱，淨係呢個Gimmick位已經夠抵死。劇未播出，已經有網友批評話《野》劇抄襲電影《穿Prada的惡魔》，有冇抄襲其實呼之欲出，毋須多拗。潮流角度又點呢？阿姐在劇中演出時裝雜誌老總，形象百變，日日唔同衫唔同Style，大家點睇？相當矛盾，師奶一般認為阿姐髮型過了火位，但專業意見一般認為無問題！所以幾時都話，靚唔靚都好，鍾意咪得囉！
記者：陳諾堯
阿姐：「係我自己話要咁樣剪嘅」
阿姐在娛樂圈打滾咁多年，出咗名形象百變，熱咖啡的造型更是深入民心，但大家有所不知，原來今次在《野蠻奶奶大戰戈師奶》劇中的所有造型都是由阿姐自己一手包辦，絕無經形象顧問服裝指導！阿姐更出動了幾百件私伙衫，公司只替她購買了數件，所以劇中服裝都是佢心水選擇。被問到有關髮型的問題時，阿姐更雀躍地說：「髮型上我畀咗好大意見，係我自己話要咁樣剪嘅，我覺得簡單得來又有Trademark，易襯衫，睇落又Classy！起初導演同大家都覺得好難接受，但睇耐咗又冇嘢，蔭要成日修，要Keep住個型靚！」睇嚟阿姐自己好滿意個髮型！阿姐笑言：「都着咗幾廿年衫，自己Styling一定得！」
NelNel：「髮型特別襯到衫！」
問到經常品評女星穿着的NelNel，佢對Lisa姐在《野蠻奶奶》劇中的Styling可謂有讚冇彈，雖然直言感覺到此劇有學《穿Prada的惡魔》，但做戲的衣着必定要誇張先至靚。「我真係好鍾意，最鍾意Lisa在宣傳海報的造型，十分有High-fashion的感覺，又有戲劇感，衫的Cutting和質料好靚，一睇就知道係靚嘢，簡直放阿姐上天橋行都得！」問心Lisa姐這個宣傳海報造型真係在眾多造型中最靚的一個，她戴了GiorgioArmani的帽和着了它的Jacket，淨係呢兩件Armani已經要$8,600！唔靚就假喇！除此之外NelNel更大談Lisa的髮型：「阿姐個髮型好特別，做戲就襯到，仲襯到佢啲衫，整套眼鏡、服裝、帽和髮型都Styling得好好！」
潮跟阿姐戴AlainMikli
相信大家都知道Lisa姐為呢套劇出動了6位數字私伙，全都是阿姐自己所喜愛的衣着和飾物。無綫高層陳志雲勁愛AlainMikli眼鏡就大家都知，所以《野蠻奶奶》呢套高清重頭劇，又點少得AlainMikli的贊助呢！阿姐在劇中時常佩戴的兩副太陽眼鏡都是A.M.貨品，Lisa姐粉絲不妨買番兩副嚟戴吓！
查詢：AlainMikli（25230103）
中環威靈頓街28號地舖
網民有讚有彈
香港討論區有一位joycecy網友大讚《野蠻奶奶》可當電視汁撈飯，阿姐做得好，演技好。
Uwants討論區nickync話《野蠻奶奶》分明就係《穿Prada的惡魔》，明抄！
Uwants另一網友leetinnok認為《野蠻奶奶》好似《穿Prada的惡魔》，但係TVB又唔幫牌子賣廣告，變相冇晒潮流資訊，仲有阿姐着啲衫又冇人哋咁好睇！
師奶：阿姐「老嘢扮童黨」
關太
「第一集開場阿姐個Look好似英女皇，好誇張！其他造型則有點兒老嘢扮童黨的感覺，個髮型還可以接受，可能因為咁多年睇慣咗佢，所以就算佢60歲着啲咁勁嘅衫都接受到。」
薇姐
「髮型肉酸，好似好假咁，佢唔係好似60歲，但係個髮型太過潮，過咗位！」
孔太
「Lisa姐劇中的形象有時太過復古，變咗唔好睇。𠵱家個個都講Fusion，應該多些Mix&Match！佢個髮型要加頭飾先好睇，好似戴帽咁，但阿姐60歲真係算犀利，俾着尹飛燕就一定唔可以着到好似佢咁！」
陳太
「我覺得佢髮型最惡睇，好肉酸，佢可以整其他髮型，唔一定要係呢個囉！𠵱家佢個樣直情好似個醜怪公仔咁，搞到佢成個樣醜晒，但係如果戴帽就順眼好多。」
時裝編輯：阿姐有FashionSense
Annie（《More》時裝編輯）
「如果係Lisa自己做Styling，以佢呢個年紀真係好有FashionSense，佢做呢個角色好入型入格，事關有搞笑成份，所以衫誇張咗都在所難免。𠵱家香港開始好興頭飾，Lisa喺選擇頭飾方面好好睇，Fashion已追得好貼，Lisa好肯試唔同嘅Style，以一個60歲女士來說，佢着衫真係好睇，唔會似個阿姑。」
Joanne（《蘋果》副刊時裝編輯）
「套劇幾得意，第一集開場嗰套全紅色衫幾Sharp，如果真係全部都係由Lisa自己做Styling咁真係幾勁，真係想搵佢做Styling，哈哈！」
Younie（《蘋果》副刊時裝記者）
「純粹係睇阿姐的Gimmick，多過睇佢啲衫，佢嘅風頭蓋過晒啲衫，所以雖然阿姐啲衫係名牌，但係着咗上佢身上面就唔太似。另外我覺得佢個頭有些過份造作！」
Chris（美術）
「我覺得阿姐的Styling幾好，但覺得佢個妝化得太黑，眼尾的魚尾紋顯得特別勁，我自己就最鍾意阿姐宣傳海報的Style。」
小儀（編輯）
「同真正《穿Prada的惡魔》中的主角好唔同，人哋靚好多！」
