小生「雞瘟」真係唔知行緊乜嘢運，近年事業愛情頭頭碰着黑，佢自從成為一線小生後，次次拍拖都冇好結果，同啲女朋友反晒面收場，搞到佢嘅形象差晒，幾乎係師奶觀眾都憎佢，N年前已經喺香港企唔住腳，惟有返內地拍劇維生，但都係越撈越霉。
關仁聽講早排雞瘟喺內地做騷，為一間桑拿浴室擔任表演嘉賓，聽聞佢全程匿嚟匿去，堅持唔畀傳媒影相同做訪問，一唱完歌即刻雞咁腳鬆人，斷估都知道佢梗係覺得喺浴室唱歌有啲騎呢，至要左閃右避啦。
以前佢做內地嘅樓盤騷、慈善騷，九秒九彈出嚟畀記者任影，唱浴室騷就零舍鬼祟，其實都係搵食啫，應該大大方方，先可以長做長有嘛！不過關仁都好想知佢唱緊歌嗰陣時，啲客人係咪赤條條、邊冲凉邊聽歌嘅呢？
Textby關仁
