港股上周五氣勢如虹，卻遇上當晚美股狂挫，買咗貨過夜的確唔多舒服，不過，假如要趁低買貨或減持，要分清楚買同賣之股票係乜股。假如買咗啲以美國為主要市場嘅出口股，咁就要優先沽出，假如買嘅係地產股，其實無必要咁驚。
上周五美國公佈差過預期的就業報告後，市場預期月底美息減半厘嘅比率驟增至五成以上，若然真係減半厘，到時本港供樓利息會進一步降低，更重要係踏入08年可以講乜都加，通脹率肯定遠比預期嚴重，通脹加減息，負利率效應絕對唔可以睇小。
大行近期亦喺地產股中尋寶。瑞銀日前發表報告，建議買入會德豐（020），目標價由16.65元大幅調高110%至35元。瑞銀指出，長實（001）與和黃（013），以及恒地（012）與恒發（097）等有控股關係的公司出現套戥情況，九倉（004）與會德豐之間亦有此情況，以九倉目標價54元計，持有該股的會德豐每股應值32.50元。
股價折讓有望縮窄
瑞銀指，會德豐現價較其每股NAV預測31.50元，有24%折讓，隨着財務靈活性增加，可望在本港發展多個項目，及有機會私有化會德豐地產（049），未來價值可被釋放。瑞銀預期香港樓價前景好轉，以及集團擴展內地市場，會德豐股價較NAV的折讓將會逐步縮窄，08年每股NAV預測為38.90元。會德豐上周五收25.05元，目標價有近10元水位，的確係幾吸引。
市值細華大唔起眼
三四線地產股近期亦見活躍，尤其在收購舊樓重新發展方面。華大地產（201）上周五公佈，以9388萬元購入上環皇后大道中249至251號兆豐大廈全幢物業，成交後該物業將被清拆，伺機重建。西環樓同上環樓因憧憬有地鐵而狂炒，呢單交易，好有睇頭。華大都算係地產股中最唔起眼一隻，市值太細得嗰17億銀係原因之一，另其股價長期沉悶，除非有重大催化劑催谷股價，否則都幾難會大升。