本港六大電子傳媒昨日派員出席百萬行，雖然無綫聲勢浩大，但冷不防亞視找來「翻版陳志雲」盧海鵬和「老翻方逸華」吳浣儀踩場，還走到無綫大隊前合照，擺明攞彩。至於馬德鐘近日獲無綫簽為親生仔，他承諾減少夜蒲，一洗負面形象。
公益金舉辦的「港島、九龍區百萬行」昨日舉行，在香港大球場舉行起步禮，無綫副行政主席梁乃鵬率領高層樂易玲以及李司棋、陳豪、郭羨妮、馬德鐘、胡杏兒和黃宗澤等數十藝人出席，亞視則由董事兼營運總裁何定鈞帶領盧海鵬等藝人。
新劇角色似丁蟹
雖然無綫總經理陳志雲放大假未能出席，但卻有盧海鵬所扮的「翻版志雲」，他與「翻版方逸華」吳浣儀踩過界，走到無綫大隊前讓記者拍照，恍如兩位翻版高層率領無綫大軍起行，非常搞笑。
郭羨妮和曾傳緋聞的馬德鐘則顯得避忌，未見有任何交流。馬德鐘近日再成為無綫親生仔，跟無綫簽訂經理人合約，他說：「樹大好遮蔭！其實93年我同TVB簽過經理人合約，係第一代經理人合約藝員。」是否對將來攞獎有着數？馬德鐘說：「冇諗。我簽咗4年，3月我會同阿姐（汪明荃）拍劇，角色有啲似丁蟹。」有傳他跟前經理人反目，他否認說：「大家係好朋友，可能第時出唱片搵番佢，但簽番TVB個心定啲。」
樂易玲則謂觀察了馬德鐘一段時間，見他乖了才跟他簽約，馬德鐘說：「係㗎，我明白入屋着重觀眾。」會否重新做人？他說：「我承認負面新聞太多，可能成日出嚟飲酒，我會減少夜蒲。」會否減少跟異性出街？他說：「一向唔多，係正常來往。」馬德鐘表示知道日後要乖，其時樂易玲插嘴說：「唔聽話就要罰，總之要保護形象，注重家庭。」
郭羨妮拒講拍拖
樂易玲又笑說：「佢（馬德鐘）求咗我好耐先至答應簽佢，其實係我求佢好耐，公司越嚟越需要擔劇嘅藝員，以前女生宿舍嘅Macy（陳美詩）都簽咗番嚟。」郭羨妮被問到馬德鐘再成無綫親生仔時，她向助手求救說：「佢哋（記者）終於都問我馬德鐘。」然後着記者問馬德鐘本人，又說：「希望新一年唔好再講緋聞，就算真係（拍拖）都唔講，蔡少芬教我到結婚先講。」
採訪：馬建華、李珮洳
攝影：陳慧安
