據說，18歲少男最喜歡的，是16歲的少女；28歲男子最喜歡的呢？也是16歲的少女；38歲熟男最喜歡的呢？仍然是16歲的少女……懶逐個寫，總之呢，48歲58歲68歲至到98歲男人最喜歡的，更加是16歲的少女。
反過來，到底有甚麼是8歲至108歲女人「通殺」的呢？
今年16歲的少男不要傷心，但這條題目的真正答案恐怕是「粉紅色」吧！
對，粉紅色，娉！
懲罰性粉紅
同一則新聞在報紙上的國際花邊新聞中恐怕出現過，但我要隔了很多夜之後在美國版《GQ》雜誌上才看到，萬一你也像我一樣，關心裙子上的花邊多於報紙上的花邊，好，現在捧這道急凍點心出來和大家分享：你知道自四個月前開始，泰國警察如果其身不正，犯了例如返工遲到、違例泊車或對待市民態度惡劣等輕微過錯，會得到怎樣的「紀律處分」嗎？
守水塘？燉冬菇？扣人工？停職？社會服務令？遊街示眾？統統不，在曼谷當差的兄弟說：「比死更難受！」因為有污點的警察們，從此執勤時要戴上印有HelloKitty公仔和心心圖案的粉紅色臂章！
噢，戴HelloKitty出街原來是懲罰！起碼對黑黑實實man到不能的佛國執法者來說是囉！
我懷疑在這件事中粉紅色也有一定貢獻，要是這個遊刑臂章是黑的，上面的公仔如果換了同廠的MyMelody個FriendKuromi，未必阻嚇得到ThaiPolice的違規隊員。至於那些一向行得正企得正的泰國女警呢，又會不會為了這個市面上買不到的限量版kawaii東西，而專登着住制服當街撩仔博「internalaffair」的同事紀律處分佢呢？嘻嘻。
我懷疑這一招鄧竟成不能抄，粉紅色的HelloKitty臂章絕對不適合作為香港警隊的懲罰性服裝，因為，到底是在罰誰？有時我行街見到有人着晒全身粉紅色Kitty造型，我覺得係罰緊我囉！
由此，又引起我另一個聯想，你的「懲罰性時裝」是甚麼？要你着乜嘢你才會有種「不如一刀殺了我吧」的感覺？
不妨想想下次喺街撞到我告訴我，係，講畀我聽得嘞，千祈唔使着畀我睇呀吓！Thankyou！
粉紅救兵Vs粉紅叛兵
任何有心計的商人及設計師都不會不推出人氣商品的「pink版」，但也絕不會一開始就拿批粉紅的出來。明明可以2015才推出，為甚麼要2012給你？多呃幾年是幾年。
Goyard算有良心喇，大可以等2032二百周年時才把招牌YY印花變成粉紅色，喂，平時都長備10隻色你揀啦，仲想點？如今早了足足四分一世紀，認真唔話得。唯一美中不足的是，肯出粉紅色版本的，以我所知（錯請指正）暫時只有較適合女性使用的totebag嘥士與Jeanne型號，較合男身比例的Boeing、Comores、Majordome等則沒有，或者主流文化都內定了男人老狗是不能紅粉緋緋的，朋友剛生了個慈姑椗，你敢不敢反傳統送套粉紅色的BB衫，而不跟大隊送粉藍？向來至butch的你，如果有個堅持將客廳裝修成全粉紅與花仔的愛妻，你還敢不敢約班兄弟返屋企隊啤睇英超聯？
罅V戇呵
以下是我的故事，好呢味嘢的人可以自行配上《LaVieEnRose》作背景音樂。
我在中大讀社會工作系的第三年暑假，被派往愛民邨作修學實習，一個唔好彩被抽中做我至怕至唔想的範籌──外展社工。
如果你仲未覺得好笑，咁你一定唔知我平時係點着衫嘅，或者，你一定唔知「外展社工」係做乜嘅！
我的實習任務呢，其實就是在愛民邨的球場、機竇、快餐店等地方，主動結識我們認為「有機會學壞的年輕人」，建立關係，然後找出他們的問題，並嘗試將這些邊緣少年重新導入正途。（題外話：睇我個款似唔似識打士碌架先？真相係，篤波，我得！就係因為呢次實習我被迫在何文田區的桌球室蒲了半個暑假！唔係咩呀？）
話說我的其中一個服務目標是個父母搵食唔得閒理搞到成日喺屋邨商場打躉的小五學生，我supervisor認為這個個案如果繼續這樣下去，一定會結交到壞分子而被踢入黑社會，於是派我去將他「導入正途」，實際上是派我去陪佢玩，同時不厭其煩苦口婆心地勸他多返屋企溫書，要玩頂多去社區中心之類。
誰不知這位小五生當我耳邊風，一星期巡區兩次，次次還是見他周街hea，足足兩個幾月冇任何改變，我正在檢討自己的失敗並擔心呢個placement一定肥佬之際，峯迴路轉地這名小五生竟然忽然完全絕迹於邨內公眾場所。正當我眼泛淚光認為他一定是被我的好心和耐性感動所以回頭是岸的時候，我在邨內商場遇見了小五生的朋友：「佢老竇老母有日放工見到你同佢個仔玩緊，覺得你係壞人，於是咪以後唔准佢出街囉。」
吓？原來係我！
雖然作為一個實習外展社工，我的設計不是這樣的，但從結果看，我都係幫咗個邊緣少年回家唔使流離浪蕩學壞晒吖。
做社工，做到似壞人，我其實都唔知應唔應該開心？不過，我都係揀咗開心囉，唔係點啫？
本周後話
事後我越想越覺得有啲唔忿氣，世人為甚麼總把打扮新潮的自動撥入壞人，於是又捉着小五生那個friend嚟問：「我嗰日係咪着咗黑色皮褸，所以佢爸爸媽媽以為我係黑社會呀？」
佢話：「唔係，聽講話你嗰日係着咗件粉紅色T恤加粉紅色波鞋，佢哋覺得你係基佬呀！哈哈哈！」
哦！原來在某些人心目中，黑社會唔恐怖，基佬才恐怖；黑色唔得人驚，粉紅色才得人驚！
吹脹！
好，等我今日就着粉紅色先！
