我求大俠呢幾日心情特別靚，皆因NBA球星姚明攻入30分協助火箭連贏兩場，效力英冠查爾頓嘅鄭智，前晚英足盃1:1和西布朗場波52秒就入波，中國體壇終於有番啲正面新聞啦！
海外球員歷來「第2快」
呢兩位中國球星有個共通點，就係為人低調、做事默默耕耘。好似鄭智呢次52秒入波咁，賽後連提都費事提（亦唔係好值得提！），只不過啲內地傳媒慣咗煽風點火，於是連夜摸黑翻箱倒櫃，等第朝吹捧一番嘅啫！
據《新浪網》講，鄭智係繼范志毅、孫繼海、李鐵同郝海東後，第5位參加英足盃嘅中國人；嗰個52秒嘅入波，除咗係首位中國人喺該盃賽入波外，更加係外流球員第2快嘅入球，最快係80年代效力貝爾格萊德游擊隊嘅柳海光（45秒）。
其實，好多喺外國居住嘅中國人都要學吓鄭智咁低調，更應該學好英文融入當地社會，唔好郁下就話人哋針對你。好似鄭智一直都學緊英文，「我每個禮拜都去學校上英語班，只要繼續住耐啲、同街坊講多啲英文，就好快適應落嚟啦！」
今季鄭智表現好出色，計埋呢場波已經取得7個入球，其中聯賽上陣24場入5球，係球隊佔據英冠第5位嘅功臣。領隊柏度今仗賽後大讚佢提高進攻效率，《天空體育》賽後評分，鄭智以9.5分成為得分王，查爾頓亦以「完美」形容呢球52秒入波嘅作用。不過，威還威，最緊要都係季尾幫到查爾頓升班，咁就威過威士忌！
我求大俠諗諗吓都要建議中央電視台，搵鄭智拍番套《中國人在海外》，教吓海外中國人點樣過得和諧啲，仲可以搵孫繼海同董方卓做反面教材𠻹！因為「老孫」到𠵱家都淨係識得唐人街，「小董」就仍然同隊友溝通唔到，好心學下鄭智啦！