汪明荃噚日喺尖沙嘴新世界萬麗酒店出席「珍荃友愛三十年」嘅fans聚會，現場有逾百名阿姐嘅fans出席，阿姐主演嘅無綫劇集《野蠻奶奶大戰戈師奶》近期大受歡迎，阿姐一進場，fans即大嗌佢劇中名字「O姐」，之後又大讚阿姐青春到冇得頂，𠱁得阿姐非常開心。現場播番30年嚟阿姐出席明荃之友活動嘅相，阿姐又同班fans切蛋糕慶祝。
特別設計造型
現年60歲嘅阿姐一向打扮前衞，佢噚日着咗條銀灰色娃娃裙出場，左手揸住一大堆氣球，右手就揸住個Barbie公仔，打扮跳脫，難怪俾班fans大讚佢青春，阿姐話：「我同個髮型師話想個造型有partyfeel，所以佢幫我設計呢個髮型，之後我再買幾個氣球同埋個公仔。」
阿姐話佢嘅明荃之友已經成立咗30年，希望fans會繼續支持佢，佢話：「我唔知我呢個影迷會係咪香港現存最歷史悠久嘅，秋仔（鄭少秋）嘅影迷會應該同我差唔多時間，不過我每年生日同埋周年慶祝都會同fans見面。」
