如果當自己係一個基金經理，新年伊始，你今年嘅投資大計會點樣部署？
舊年年尾，敏妮同好多炒股前輩傾偈，佢哋不約而同話，今年大市會好瘋狂，但瘋狂過後可能滿目瘡痍。雖然話投資唔同投機，但正如《信報》曹仁超所講：「有智慧，不如趁勢」，既然個市會瘋狂，有機會去「博」點解唔嘗試爭取高回報。
好股唔怕返頭買
不過，既然係本住「博」嘅精神，咁就一定要冇後顧之憂，所以敏妮只會將部份舊年贏番嚟嘅錢做投機嘅注碼，只要做好平衡風險，投機唔係壞事。
敏妮有個數口好精嘅朋友，佢同敏妮有同一嗜好，就係搵money，所以佢經常都會send電郵畀敏妮，講吓投資。早幾日，敏妮又收到呢位朋友嘅email，佢劈頭就問敏妮有冇抽到中鐵（390）同中材（1893）。中鐵、中材招股時，咁啱敏妮放假外遊，所以錯失良機！呢位朋友問得，正係因為佢抽中，咁仲唔止，佢話家陣兩隻股日日都keep住升，佢會伺機再買喎！
雖然敏妮喺中鐵、中材招股時冇認購到，但好股唔怕買，所以敏妮都同呢位朋友一樣，吼緊買入嘅時機。除咗呢兩隻股票，敏妮之前同光頭仔傾開新一年投資大計時，光頭仔話留意緊阿里巴巴（1688）──孫柏文經常掛喺嘴邊嘅300倍PE股票。
炒股要平衡風險
敏妮相信，光頭仔留意嘅原因，絕對同基本因素無關，純粹為咗一個「炒」字，阿里巴巴由頭到尾都係一隻炒股！既然同數口精朋友講開股票，即管問吓佢點睇阿里巴巴，佢留低咗一句說話畀敏妮「speculativeandrisky=opportunities」。啱吖，有危先有機，但佢不忘提醒敏妮，萬事小心！
http://wanmanli.com/blogs/