黃耀明聞《心花怒放》起舞
「我心目中嘅金曲係指自己最鍾意嘅歌，今年有兩首歌我係好鍾意嘅，而且成日都會唱住，其中一首係快歌，就係容祖兒（左）嘅《心花怒放》。我覺得𠵱家嘅頒獎禮得獎嘅都係慢歌，搞到個氣氛有少少悶，我個人就比較鍾意快歌。另外一首就係關智斌嘅《預言書》，呢首歌嘅旋律同歌詞都好好，早排嘅音樂會上我都有唱呢首歌。」
鄧麗欣愛《香港始終有你》
「我會覺得係群星合唱嘅《香港始終有你》呢首歌，播放率高，而且人人都識得唱，連我屋企年紀小小嘅外甥都識得跟住唱，真係去到邊度都聽到呢首歌。首歌好聽之餘，啲歌詞又容易上口，兼且每位歌手都唱得好有個人風格。」
少爺占撐城城《舞林正傳》
「如果畀我揀今年嘅金曲，首選一定係郭富城（小圖）嘅《舞林正傳》，呢首歌真係正到爆，首先啲歌詞又多又快又密，去到chorus嗰段阿城係嗌出嚟㗎，睇佢演唱會時見佢個嘴郁得幾咁快呀。同埋你問吓有邊個唔識呢首歌，只要一唱『everybody』呢個字，個個都知道係乜嘢歌啦。」
方力申奧運歌具感染力
「我認為《奧運在北京》係今年嘅金曲，首歌由吳國敬作曲，譚詠麟監製，而且集合中港台三地歌手合唱，成首歌好有感染力，由香港人作曲嘅呢首歌絕對係為香港爭光，藉住呢首歌大家一定會更加留意同關心08年北京奧運。」
採訪：李珮洳、卓美娟
