港區人大代表選舉噚日開始接受報名。早前已事先張揚，話要報效祖國嘅前教統局常任秘書長羅范椒芬，第一日就趕去報名，實行擔凳仔霸頭位，增加曝光率，「飯焦」話晒係前高級公務員，又負責搞香港教育政策，推動通識教育，叫學生要關心時事、認識祖國，但係佢噚日報名嗰陣，講到佢對人大嘅認識，加埋連人大邊日投票都搞錯，八方聽到就笑死，但有在學子女嘅家長就要諗下：囝囝女女係咪要重新學過通識學科﹗咁都咪話唔驚。
曾經話自己唔鍾意做騷嘅飯焦，噚日一早去上環信德中心人大選舉報名處交表，約咗記者遲到不特止，出場時仲失驚無神拎出一大叠宣傳單張，塞畀現場職員，結果吸引到攝影師衝上前影相，但呢啲咁慣常博曝光嘅宣傳伎倆，難為咗班職員，無端端做咗人肉宣傳板！
選人大≠搞政治
識做騷未必有用，要選人大，起碼要識多少國情，知道人大究竟有乜嘢職能先？飯焦當年敗走教統局，頂唔住民意對佢批判，就發晦氣話香港政治畸形，令佢厭倦政治，講到政治點樣十惡不赦，𠵱家佢又走去選，係咪前言不對後語？點知飯焦話，「我唔覺得呢個（人大代表）係政治。」八方即刻呆咗！全國人民代表大會即係中國嘅國會，中國憲法第57條寫明，「中華人民共和國全國人民代表大會是最高國家權力機關」，選人大代表，即係等於選國會議員，咁都唔叫政治，乜嘢先叫政治？難怪飯焦搞通識教育，畀唔少人批評搞到學生「通通唔識」！
單張印錯投票日
除咗連人大代表係乜都唔知，最搞笑係飯焦份宣傳單張，叫人2月25日一定要投佢一票，不過人大選舉係1月25日投票，咁究竟飯焦叫班人大選委2月25日投乜嘢票？抑或係佢其實想叫班人大選委，喺1月25日唔好投佢自己一票？身為前高官，理應做事好有條理，連投票日都搞錯，叫人點選佢呢？
噚日有行家問飯焦，話佢份宣傳單張似葉劉，飯焦立即「黑面」發火，猛話自己唔似葉劉。八方都同意，起碼葉劉參選立法會補選，宣傳單張雖然都有錯字，但未至於「水皮」到連投票日都搞錯！