世事如棋，縱使港聯的伊達多次被廣東球員踢至倒地，這名巴西中場卻以全場唯一入球回敬對手。兩回合計以4球淨勝的港聯成功衞冕省港盃，而廣東隊不單止30年來第2次捧蛋，其輸打贏要踢法，更在萬千觀眾面前輸掉風度。
次回合省港盃昨假佛山世紀蓮體育中心舉行，東道主首回合雖落後3球，但仍吸引8,000多球迷捧場，儘管只佔據了球場四分一的座位，但擁躉們大鑼大鼓的打氣方式，令現場氣氛相當不俗。
伊達被「圍攻」以入波回敬
可能情緒過於高漲，加上求勝心切，廣東球員收起一星期前在大球場的禮貌及友善，一落場即以批踭、踢死腳、飛鏟、要人唔要波等「辣式招呼」港聯球員；其中今仗取代陳肇麒擔任正選的伊達，更成廣東球員目標，多次被踢至倒地，就連坐在後備席的教練路爾斯亦看不過眼，跑到場邊與球證何志彪理論。
擔任隊長的李海強，雖與個別廣東球員認識，但眼見南華隊友被蓄意侵犯，不禁在場內大叫：「有冇搞錯。」可能因這名前廣東代表兼前國腳看不過眼關係，廣東隊員下半場粗野踢法亦有所收斂。
下半場70分鐘，港聯有意收起伊達時，他接應祖利亞直傳，單刀埋門射破廣東門將支鑫華十指關，領先1:0。落後的廣東積極反撲，而馬亮及盧琳完場前獲兩次單刀機會，但一一被港聯門將盧斯奧瓦解，港聯得以保住1:0比數，兩回合計贏4:0蟬聯第30屆省港盃。
兩領隊出10萬作獎勵
港聯領隊羅傑承表示：「對手踢得非常粗野，能夠作客贏波兼沒有失球，絕對收貨。」港聯贏波後，每名球員除了獲足總派出的5,000港元獎金外，兩名領隊（另一是周文亮）合共拿出10萬港元，分予全隊作特別獎勵。
身兼廣州醫藥的廣東教練沈祥福，未有就球員踢法粗野作回應，只表示多謝球迷支持，日後中超重開後，他們將可看到全新的廣藥球隊。
本報佛山專電
省港盃歷來大戰果(兩回合計)
屆別：30
總比數：港聯4:0廣東
屆別：18
總比數：廣東8:1香港
屆別：17
總比數：廣東4:0香港
屆別：13
總比數：廣東6:1香港
屆別：10
總比數：廣東3:0香港
屆別：1
總比數：廣東4:1香港
資料來源︰香港足總
花絮：港聯球迷唔夠聲勢
南華球迷會噚日組佛山睇波團，178蚊包交通、兩餐、門票及打氣tee，非常超值。不過，報名球迷有半數屬長者，要佢哋全場打氣，聲勢當然唔及人強馬壯嘅廣東球迷。
花絮：東道主fans贏裝備
東道主球迷無論人數、叫口號、裝備都贏香港球迷，好似呢位靚女亦拿出樂器為廣東隊打氣，唔好聽都睇得。而主隊為收買球迷歡心，竟然現場派波衫，雖然都係過氣嘅上季廣州醫藥隊球衣，但球迷亦很滿意。
花絮：國內門票貴過香港
國內消費高企，單睇本月19日關菊英嘅佛山演唱會，最貴賣600蚊人仔都幾犀利。噚日門票分60、90及120人仔，貴過香港一半。現場有人賣黃牛飛，不過就比正價平10蚊，所以賣飛處都幾冷清。
花絮：攤位遊戲車展有靚女
比賽場地佛山世紀蓮體育中心，外型成個蓮花咁，睇上嚟幾壯觀。由於地方超大，比賽前亦有唔少攤位遊戲或車展，在場外畀球迷欣賞，其中花式單車（右圖）最多人睇，其次就係有靚女嘅車展。其中一間展銷商，仲送出一架歌露娜（Corolla）畀一位入場觀眾，都算幾大手筆。
