去年步入1月初，商品價格因拆倉潮而急瀉，但在08年開始不久，油價便輕易升破100美元，金價直闖860美元，當然此與美元疲不能興有關，同時亦反映全球通脹威脅加劇，炒家借勢推高商品期貨價格，助長升勢。
金價飛升，金股自去年底以來其實已經明顯偏強，升得合情合理，惟令人奇怪的是油價急升，油股卻毫無反應，到昨日石油股才稍見異動，仿似油價升跌，對油公司利潤無甚影響，尤其係中石油（857），舊年就話賴股神畢菲特沽貨，如今佢都沽晒貨，仲有乜好賴？相信不少散戶亦有同感，對中石油之弱勢困惑不已。
里昂最近發表報告，亦認同近期油價升勢唔係虛火，並且將08年全年油價預測由每桶60美元上調至80美元，大幅調高逾30%，主要是基於近期OPEC不增產的決定。
報告認為油價高企對上游石油股有利，假設油價在100美元計，中海油（883）全年純利會比現時該行預測高出30%，而中石油同樣亦會多賺30%，但就要國內汽油價格亦獲調高10%至15%。
基本上連大行都對中石油弱勢唔多認同，睇番A股表現可能有啲啓示。A股（601857）自首日掛牌開出天價48.62元人民幣後就一直下跌，上月曾跌至29.15元，最近才反彈上31元，未知係咪因此影響埋H股表現，而更大原因，應該係市場相信國內通脹嚴重，中央唔會容許成品油大幅加價。
現價買入贏面高
不過事實證明，人為壓低汽油價係唔可行，油站一旦又再扣起唔賣油，汽車大排長龍見報時，中央迫住又要出手。事實上，近期已有風聲說中石化（386）將獲巨額補貼，補償低價賣油之損失，長遠而言，一味靠補貼都唔係辦法，即使唔推出成品油價格機制，逐少加價點都需要，現價買中石油應該贏面好高。