昆士柏流浪都有水喉！
車仔有「油王」阿巴「射住」，但佢哋英足盃對手昆士柏流浪，何嘗唔係有位大有錢佬班主新注資先？阿巴豪擲5,000萬鎊買人都仲係斟緊，但流浪個新老細已經二話不說，幾日就買咗7個新兵，以新面目、新陣容大戰車仔。
狼隊義助查斯城
英冠球隊狼隊認真夠義氣，見到來自斯塔福德郡嘅地區球隊查斯城要越級挑戰卡廸夫城，就決定仗義相助，借個訓練場畀對方作為備戰之用，搞到查斯城領隊碧克摩亞感動到不得了，仲話：「呢份係最佳嘅聖誕禮物！」
盧頓對紅軍未輸實
英甲嘅盧頓禮拜日越級挑戰利物浦，講實力同名聲梗係冇得同紅軍比，不過係咪真係咁一面倒呢？又唔係喎，因為兩年前嘅同一賽事同一階段，盧頓就曾經令到紅軍飽食驚風散，幾經努力下先至以5:3反勝呢支低組別球隊。
地方球隊抬起頭來
英足盃係英格蘭國內所有組別都可以參加嘅賽事，所以今次第3圈就有查斯城、劍橋聯同埋哈雲特3支地區或非聯賽球隊出現，能夠同一眾英超勁旅好似阿仙奴同曼聯喺同一賽事亮相，就算唔係對壘都好似「升級」咗啦。