二○○八，人人顧住易發，集中火力搵銀，集中力量消費。市道大好，人的心胸自然廣，講錯話都可以側側膊算數，冇人會上心上腦。是以人人都可以當預言家，替中港台摸摸骨，算算命。
第一項預言，是北京奧運必定由中國奪得最多金牌。別問風水佬有什麼根據，風水講運不講實力，八九六四令北京一沉不起，等了十九年終於大翻身，氣勢贏晒。奧運這一鋪，實聽買大開大，唔會大熱倒灶。
第二項預言，是馬英九會贏。阿扁搞到蔣公死唔眼閉，驚動陰靈，叫人想起八九六四時有農民向天安門廣場毛像潑污，毛主席臉色遽變，頃刻間北京的藍天蒙灰，颳起不尋常大風沙，人人都說是毛爺爺發火。阿扁沙膽搞死鬼，綠營有運行才怪。
第三項預言，股市會升破四萬點。香港人唔吼索羅斯和畢非特，淨捧亞洲股神。假如四叔開壇，年初一去佢辦公室上頭炷香的股民善信肯定墟冚過黃大仙。四叔預言今年恒指跑上三萬六，祖國阿爺幫手湊夠齊頭數又點話。
第四項預言，雖然早了些，但2017普選特首的四名候選人已經有眉目，分別是大劉、葉劉、小劉（劉德華）和X高官。（到底邊個X？因為仍有變數，只能從今年起，X住佢先）而2020未必普選立會，風水佬呃多你十年八年，到2028和2033啦，易上口嘛。