所謂「你玩股，股玩你」，這句話委真無錯，當全球股市一片淡風之際，忽然間好多人唔太鍾意的美國總統布殊露口風，將推出新一系列振興經濟措施，唔好理佢是否有意替共和黨延續政權，總之佢講一句好過「財經演員」講100句。市場馬上浮現利好憧憬，有人話月尾美息起碼會減0.5厘，港股昨以大成交急升632點。
股海水深浪大，在你最悲觀之時，市場隨時否極泰來，所以早幾日星俠已經講過，今年散戶入市炒股，當在市況最悲觀時，要有樂觀心態面對；相反，當市況最樂觀之時，則不忘居安思危。
油價升破100美元1桶，係本世紀經濟一件大事。石油股昨終見炒上，但升得最勁的居然係南海石油（076），升成16%，反而最「正路」的中石油（857）不過升7.4%，至於後市油價尚有幾大升幅，真係唔易估。
內在價值未反映
星俠一直有留意深圳國際（152），該股近日宣佈截至1月2日止，以平均價每股21.56元出售手上南玻集團A股股份，稅前盈利達15.74億元。
集團目前仍持有約1.43億股南玻A股，其中約2550萬股可在深交所自由交易，其餘在今年5月24日起亦可「任意處置」。深國此項投資回報「啖啖肉」，此外，還未計其持有之深高速A股價值，故星俠認為深國實質價值尚未反映。其股價1元水平防守力不俗，伺機吸納持中線，跌穿0.85元止蝕。