泛民主派係今次人大選舉入面，手握百幾票，雖然一早有愛國愛港、兼且有西環撐腰嘅左派人士話，唔稀罕泛民個百零票，冇興趣問泛民攞票，不過其他冇西環力保嘅候選人，自然唔係咁睇，參加選舉，梗係想贏，話之票係泛民定阿爺，總之有票就有偈傾，話唔定就係爭泛民嗰啲票，可以由輸變贏，所以八方噚日見唔少報名參選人大嘅人，無論係行會成員查史美倫，定係有西環撐嘅現任人大溫嘉旋，都話要拉泛民選票，事關不論係普選定小圈子選舉，冇人會嫌自己得票太多！
講開溫嘉旋，唔知佢係咪貴人事忙，竟然唔知人大選舉報名處中午休息，結果「摸門釘」，要下晝再去多一次，正如阿爺話齋，選人大係莊嚴嘅事，行多一轉都係值得！