身為香港足總主席梁孔德，噚日做咗「跟得丈夫」，陪太太、自由黨立法會議員梁劉柔芬去報名參選人大。梁孔德見到記者即三句不離本行，今日喺佛山開波嘅省港盃，佢話會趕去臨場睇波喎。早前香港代表隊喺主場迎戰廣東省代表廣州醫藥時，以3比0大勝，港隊自然踢得好好。梁主席好有信心咁話，已經叫咗港隊今日唔使去咁盡，無謂搞到對方輸得咁難睇，又話，為咗滿足本港嘅球迷，會派出多啲香港土產球員，少啲外援上場咁話。佢又叫香港球迷放心，因為今次港隊狀態好fit，一定能夠攞個獎盃返香港喎。
煲呔前日去咗廣州，同新任廣東省委書記汪洋大唱粵港合作做主調，唔通因為咁，搞到連踢波咁嘅粵港活動都變咗要以和為貴行先？