坐鎮九龍東嘅工聯會立法會議員陳婉嫻，喺左派之中形象一向唔錯，噚日嫻姐為咗有600年歷史嘅古蹟衙前圍村嘅保育問題，連超人李嘉誠都冇面畀，喺商台節目《在晴朗的一天出發》中，公開質疑政府係咪怕咗擁有衙前圍村七成業權嘅李超人，唔敢強硬啲同李超人開條件，連廣州政府都不如。
心口掛住個勇字嘅嫻姐喺節目中自動撻着向政府發炮，話政府完全冇盡力去同李超人deal，擺明喺度批發展局局長林鄭月娥唔掂。發展局話get唔到嫻姐鬧緊政府，冇嘢回應。
長實同市建局早前公佈，話會保留部份衙前圍村古建築物，但會喺外圍起四幢廿幾層樓高豪宅，不過基座會離地六層樓高，畀衙前圍村留住一片青天。嫻姐話搵鬼信咩，「簡直對歷史建築物唔尊重﹗第日（豪宅）屁股坐住古建築物，話上有青天，係冇可能，只會係一線天。」
保留衙前圍村搞社企
嫻姐越講越火滾，話佢都已經關注衙前圍村10幾年，如果政府肯考慮多啲民間意見，就唔會叫市建局公然同長實搞公私合作。
佢又擺大劉上枱，話以灣仔街市為例，塊地雖然賣咗畀華置，市建局最後都同華置傾掂保留灣仔街市，點解衙前圍村呢個唔得，「到底係啲乜？究竟（係咪因為）長實係大財團，你（政府）唔夠膽郁佢？定係華置易傾啲呢？呢個我唔知……我覺得成個政府嘅力，冇用到喺呢件事入邊。」
嫻姐話衙前圍村好有價值，應全村保留嚟畀社會企業或搞創意工業，前面嘅啓德河將來有機會回復做清溪，到時係一個好有吸引力嘅旅遊點。佢指廣州政府發展大學城時，特別保留咗一批古建築，𠵱家成為旅遊點，點解港府唔學吓？
八方建議嫻姐學吓反對灣仔利東街重建嘅商戶May姐葉美容，絕食幾日，話唔定李超人會嚟睇吓佢。不過嫻姐講保育係咪得把口，從過往紀錄可知佢根本有心冇力，好似去年中拆卸皇后碼頭一事，口口聲聲話反對將碼頭先拆卸後重置，但到兩次投票都失蹤，好難保呢次佢唔係做騷。話時話，今年遲啲就舉行立法會選舉，係時候向各方人士抽吓水谷多啲選票，話唔埋蟬聯多次票后都唔定。