花旗股市前晚企番穩，港股昨日即刻炒上，雖然㗎仔假後復市跌600幾點，但冇影響港股嘅氣氛。
港股前日跌673點，昨日升番632點，100日線好似再度發功，港股係咪已跌完可以大升？千祈唔好咁諗，睇番外圍個勢，加埋國內宏調，真係睇唔到短線港股會大升，如果能夠反反覆覆守住條100日線就已經還得神落嘞。
不過港股如果守得住100日線同過去兩個月嘅兩個低位25862同26094，短線港股仍然有好多炒作機會，既然個市唔上唔落，喺26000至28000區域拉鋸，炒個別會成為特色，策略變成避開弱勢股，專炒強勢股。
中油可破關炒上
呢期會炒啲乜？大家都識噏，梗係石油股同黃金股，睇吓昨日油股同金股幾勁就知。紫金C輪6865升11.5巴仙，正股（2899）升7.1巴仙，睇個勢仲要炒上，如果金價維持向上嘅趨勢，就算出現單日回落，都唔使沽得咁快，推高個止賺位就得嘞。
中油C輪6737：中油（135）昨收5.31元，喺50日同100日線之間已經橫行咗好耐，今次趁油價升到飛起，好大機會破關炒上，下個位起碼睇6元，破位睇6.50元，可以諗吓隻C輪6737。隻輪昨收99仙，槓桿率5.4倍（有效3.9倍），對冲值0.73，正股升上6.50元，6737應該挨近2元，就算正股只係升到6元，隻輪都有5成幾升幅，正股跌穿5元止蝕。