中石油（857）噚日一洗近日頹勢，急彈7.4%，收報14.18蚊，13.5蚊入咗貨嘅九龍塘楊小姐即刻打上嚟推介此股，目標3個月內再挑戰舊年11月嘅高位20蚊大關。佢話：「之前已經有大行出報告睇好，𠵱家陸續有好消息話會調高盈利，油價破100美元大關，中石油形勢大好，嚟緊表現勢不可擋！」楊小姐信心爆棚，所以只向上望，冇定止蝕位。
憂暴利資源稅
楊小姐仲話，國家政策應該利好中石油，「隻股嚟緊積極發展，煉油業務方面又有機會獲得補貼，長線冇理由唔得。」亨達集團研究部董事黃敏碩亦同意，中石油業務本身冇地方值得擔心，但提醒楊小姐，「除咗要睇住油價同埋業務本身之外，中石油中線表現可能會受負面因素夾擊，好似指數下跌、A股因素，暴利稅、資源稅等消息影響。」
楊小姐唯一擔心嘅反而係，中石油升勢跟唔足油價表現，「之前油價升好多，但係中石油反而跟大市跌，好似同油價脫咗鈎咁！」黃敏碩回應：「油價升對中石油有好處，之前唔跟油價走，主要因為A股因素同埋資金自由行影響，不過呢啲因素已經淡化，水份收亁之後，未來應該跟番貼油價表現。」
16蚊多蟹貨
黃敏碩仲話，中石油100天平均線喺14.27蚊，升穿之後有機會挑戰20天線15.58蚊，不過16蚊樓上肯定好多蟹貨，要破位唔係咁易。唔反對長揸中石油，不過短線表現有機會比較反覆，「中石油噚日反彈，有機會係因為輪商之前做錯邊追貨，挾倉挾上去；如果真係睇好隻股前景，不妨過幾日睇定先入。」
維達國際（3331）
股價落後 小注無妨
前幾日英皇證券研究部主管沈振盈大力推介維達國際（3331），隻股升極都有，噚日收4.65蚊，再升9%，令美孚陳太心癢癢，問黃敏碩追唔追得過？
黃敏碩就話：「維達近期賣點，係股價落後兼有內需概念，加上PE極低，不過最忌就係佢上市唔夠半年就發盈警。」
孫柏文補充：「未來一年半載，唔使諗基金會掂呢隻股，更加唔好望會有機構投資者掃隻股上去。趁農曆年前應該冇乜壞消息，短炒無妨，不過要識得定好止蝕位，可以考慮喺4.3蚊止蝕。」
黃敏碩話，隻股跌到咁殘，小注無妨，不過如果要博，恒安國際（1044）仲值博，原因係業務分散喺紙巾、衞生巾同紙尿片度，業務較闊，而且邊際利率較高。恒安噚日收34.3蚊，微升0.2%。
招金礦業（1818）
整合擴產 短期有勢
前日西貢Michael打上嚟推介靈寶黃金（3330），畀主持同嘉賓話佢唔了解靈寶，其實係黃金價格上升嘅受害者，如睇好金價，冇理由買靈寶；點知靈寶越升越有，噚日走勢勇不可擋，升咗20%，收報5.98蚊，仲一度高見6蚊，一日已經到達Michael嘅目標價。食髓知味，Michael噚日再推介招金礦業（1818），建議現價買入，睇50蚊，止蝕位32蚊，睇3個月。招金昨收報37.55蚊，升8.5%。
黃敏碩問Michael，目標價50蚊點量度？Michael答：「預計金價上到1000美元，招金就會到50蚊。」黃敏碩認為，招金短期有勢，佢話：「招金擴大產量，不斷整合同擴充，有憧憬亦值得持有。」
黃敏碩補充：「行業內當然以紫金（2899）最好，但係紫金較貴，招金算係中上選擇，如果睇好黃金走勢，其實亦都可以考慮一啲黃金ETF，比較貼價，係一個唔錯嘅選擇。」
海油服務（2883）
欠驚喜爆炸性
大埔關公推介中海油田服務（2883），該股噚日收報18.5蚊。佢自己喺9月時買入，當時買入價17蚊，目標睇23蚊，睇半年，如果真係跌返去17蚊就平手離場算了。至於點解睇好佢？關公話：「中海油（883）會畀定單海油服務，又即將會同利比亞合作，前景一片光明。」
業務穩定 現價合理
黃敏碩話：「早前海油服務造好，其中一項因素係發行A股，所以推動股價，海油服務業務比較穩定，現價18.5蚊算合理。」大埔關公話，隻股曾經高見22.85蚊，所以問黃敏碩：「目標價23蚊會唔會太高？」
黃敏碩就認為，從穩定性嚟睇，值得持有，「但欠缺驚喜同爆炸性，雖然海油服務嘅阿媽中國海洋石油總公司，有成十幾個油田要鑽探，但佢係咪畀晒海油服務先？23蚊目標價高咗少少，可以定喺20蚊先。」
下周一嘉賓：荷蘭銀行私人投資產品部副董事何啓聰
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，登記成為「Webcam之友」，更有機會獲得（aastocks）即時報價賬戶
