新年期間，碰到行街鄭自北方回來度假，鬆一鬆再北上搏殺。行街鄭乃廣告老手，見到一位多年前客戶之太子接班人，因非禮的士司機而被檢控，特登問左丁山：「乜𠵱家香港興用女司機咩？」左丁山大笑，指行街鄭詐儍。行街鄭嘆曰：「我呢二十幾年識得唔少叻人，各行各業都有，但唔知點解，好多聰明叻仔都係鍾意男士，唔恨女士嘅，我只係奇怪女士無論點靚，佢哋都唔起痰而已。好似我間舊公司嘅新老闆，聰明英明之極，但為咗同性男朋友，竟然搞到公司內三位男同事同時爭寵，爭風呷醋，變成公開秘密，其他男女同事為之側目，我真係睇到服晒。」
行街鄭自大學時代，已喜歡追靚女，約靚女去街，見證異性相吸，到𠵱家都唔明白佢一啲同事為何人在國內，竟可對北國佳麗視若無睹。佢唔明，左丁山亦唔明，更無意深究，總之人哋男人鍾意男人，女人鍾意女人，有佢哋嘅自由，唔好搞到我哋就得。
問行街鄭北上多年，有何傍身招數，不至於被後起之秀掃番出嚟？行街鄭話：「好耐好耐以前跟阿Sir偷師，就係最緊要識講嘢。我冇資格做阿Sir手下，但每年一度，阿Sir畀面出席大客晚宴，我哋請晒最大花筒嘅客戶到阿Sir別墅食靚嘢，飲靚酒。阿Sir雖然年紀已大，但頭腦仍然清醒。記得有一年我介紹B牌大客畀佢識，阿Sir居然講：我好鍾意M牌，買咗幾架，R牌都好啫，我有兩架。哎吔，我唯有兜番：阿Sir，B先生賣B牌車㗎，今年好好賣！阿Sir聽完，恍然大悟，但以佢身份，點會認錯吖，個客面色又唔係幾好睇喎。阿Sir唔使幾秒就接口講：係吔，B牌車咁賣得呀？一定係好嘢啦，我要換走啲舊車嘞，遲吓買番兩架B牌用吓先！阿Sir講完，B大客當堂笑到四萬咁口，高興番晒。我從旁學到啲嘢，對客人說話，一定要反應快，唔好錯漏，死都講番生，但同時又唔好露於形色，監粗嚟噃。」行街鄭又講另一位暴發大戶竟然在晚宴上挑戰阿Sir練氣功，阿Sir一笑置之，事後吩咐以後不要再請此人出席。匆匆二十年，呢位客戶發成點呀？行街鄭話：「此君嘅牌子執笠好耐咯，冇人記得佢。」