當數碼電視開播，宣傳自然四面八方而來，除咗兩間電視台力谷旗下嘅高清節目外，電訊管理局當然出來話畫面質素無問題，力挺接收畫面符合標準。不過唔少人屋企睇過，都表示有雜訊或鬼影嘅問題，而電訊局就話佢哋測試無遇到呢個情況，可能係因為該大廈數碼與類比訊號未分離所致。嘩！咁都得，咁大件工程進行，原來竟然連一般民居都無去測試過，就正式推出？
講開數碼電視，除咗要Check吓住緊嘅大廈有無做改裝工程外，其實自己都可以買住個數碼天線DIY頂住先。近排筆者落過鴨記，已經見到有多款數碼電視天線擺檔食住呢條水搵銀。類型方面，由比較小型的室內天線到魚骨天線都有售，價錢就由百多元到數百元不等，視乎家居環境而選擇。不過到底邊隻抵買，邊個牌子有保證？我就唔敢代答，始終選擇多時自然亦會良莠不齊，就算係啲大陸正版，都會溝咗一啲A貨落場。建議各位落鴨記之前最好問吓身邊朋友的口碑，或者上網睇吓網民的實地測試報告，咪盡信Sales亂吹。
講開又講，網民的地區接收報告中竟然有人話，舊式魚骨天線都收到數碼電視！乜咁大整蠱呀，政府就鼓吹你買數碼天線，原來阿婆年代唐樓天台嗰啲魚骨都收到，呢個社會到底係倒退緊定係「復刻」緊呢？堅定流我唔敢講，各位得閒不妨測試吓話我知。