新年期間，原來香港酒店生意都好旺，酒店職員做到唔停手，好似酒店小YY咁，佢每日早上七點返早更，返工之後，就唔知幾時先至收工，閒閒哋做到晚上十點；乜唔係三更制嘅咩？名義上就係，但每更都唔夠人做嘢，問你點辦？
做酒店辛苦，撲酒店房間亦都辛苦，投資公司職員C收到老闆命令，要為五個來自北方嘅副廳長、工程師搵房，職員C好辛苦先至搵到旺角、油麻地嘅酒店有房，但對方知道後，在電話中露出不悅口氣，對職員C講：「起碼都住尖沙嘴啦，與日航同級數。」職員C唯有向老闆請示，老闆為之媽媽聲，因為招呼內地小官員，無月無之。如果個個要住日航酒店級數嘅酒店，條數好襟計啫，而且即使肯畀錢，都未必搵到尖沙嘴酒店房間嚟招呼北方客。
職員C對左丁山講：「我哋喺上面投資，有好多文件要官員批准，佢哋好興落嚟自由行，嚟親就打電話嚟叫我哋卜房，請食飯更係理所當然，嚟得多，我老闆就乜乜聲，但亦無可奈何。啲低層官員無權批准，但有權搞喎，老闆點都要投鼠忌器。」
香港在六十年代亦有同樣情形，衞生幫與警察三柴可以在街上打橫行，直至廉署成立，大力反貪，公務員大幅加薪之後，貪污貪便宜情況先至遏止咗。中國何時何日會見到貪污失蹤？相信胡溫見唔到。吳儀在中國國際商會演講，問在座各位國企老總：「老實說，你們誰人沒有一座別墅？」吳儀夠清廉啫，話明自己一年所有收入只有十二萬人民幣，退休後就會全退，用佢自己把口講，就係「裸退」，謝絕一切顧問、名譽會長之類職銜，講明希望人人完全忘記佢，真係夠晒灑脫，因為以佢嘅級數，是但為乜乜組織、企業掛個名譽顧問銜頭，好處多到講唔晒。可是中國有幾多個吳儀？有幾多個陳良宇呢？正是貪官難過情婦關，中國一日有咁多想搵錢嘅靚女，官員就好難唔由好色變成「好錢」，卒之變成大貪官。