空姐嬌滴滴，一般飛機乘客見到都會客氣啲，但一年總有幾次碰上粗暴嘅乘客，或者醉酒鬧事，小姑娘未必有能力應付。港龍航空就請咗一位功夫高手，編一套速成自衞術，令空姐們喺短時間，睇得之餘仲識得對付恐怖分子。
呢位關志榮師傅，外表斯斯文文，但練得一身好武功，94年由警隊轉投港龍，現身為港龍保安一哥，職銜保安總監。佢嘅其中一項主要工作，係教導空姐應付各種突發事故，由炸彈威脅到蠻不講理嘅乘客。嬌柔嘅空姐，遇到粗暴乘客除咗要懂得法例，最好就識得一啲自衞術。所以，關師傅親自編咗套速成自衞術傳授畀空姐。嘩，咁易學，唔知八方可唔可以跟關師傅學吓師呢。