新年伊始，潮流雜誌喪做回顧與展望潮items，恨得我牙癢癢。此中有恨，恨鐵不成鋼嗰隻恨也，潮青繽紛預告來年「有乜好買」，有人睇；知青知性警示出年「有乜好諗」，怕冇人睇。
政府搞通識，下場全線港人統統唔識，其實是浪費社會資源，結果好像裝完高清睇雪花，掃興又嘥氣。
找知青預估08熱terms，無遠大理想，純粹想大家知吓來年除了家宅風水股市走勢，還有甚麼值得留意；唔使講到關心局勢擴闊視野等字眼咁老土嘞，睇報紙揭完財經娛樂副刊，也掹車邊睇得明A版講乜。6蚊一份報紙，由BCDE數番上A版都睇得晒睇得明，你唔覺得抵好多咩？
記者：劉嘉蕙
攝影：陳盛臣
08通識八餸一湯
預估08通識熱Terms，Steve與Gary呈獻8項大菜，有些名字騎呢，來年時事社會政局評論，走唔甩。
尼特族（NEET）
名詞來自英國，NEET全名NotcurrentlyengagedinEducation、EmploymentorTraining，台譯「尼特族」，香港叫慣叫熟是「雙失青年」、「隱青」、內地叫「家裏蹲」或「啃老族」，美國叫BloomerangKids，意指終日無所事事、唔願返工唔願學習，留守家中做蛀米大蟲的新世代。尼特族是發達國普遍現象，高中低學歷都有，衍生大量社會問題。Steve強調，尼特族跟香港人叫到濫晒的「御宅族」有分別，後者是次文化專用詞，不宜混淆。
網吧難民
近年日本大熱新詞，跟雙失青年不同，網吧難民想找工作，但長期面臨工時不足的困境，交唔出租，惟有在網吧留宿，貪其免費漫畫飲品電腦等等設施，又有住址證明方便申請文件。對應不斷增長的難民人口，日本網吧亦推出淋浴設備及儲物櫃等服務。除網吧外，近年所謂「麥難民」時（留宿麥當勞）亦大行其道，一句講晒，那裏開通宵，那裏就有人唔畀錢打地鋪。這個字，香港人要知，皆因廿四小時營業店舖越開越多，半夜去麥當勞依然人頭湧湧。本來三唔識七你住邊瞓邊外人無可干涉，不過最近日本出現網吧肺結核，被認為可能跟「難民潮」有關，唔理會好危險。
CEO治國
CEO治國是國際新興政治模式，特點是超務實、勁經濟主導、少談理論多搞建設，領袖以提升GDP為己任，例子有出爐《時代》年度風雲人物俄羅斯總統普京、南韓候任總統李明博、以及香港人比較熟識的馬英九。曾特首仲唔算務實呀？「唔算，CEO治國領導人物作風果斷，唔似香港政府，民間少少反彈就縮沙，拋出政策轉頭又抽起。」Gary說。我搭唔到訕，我以為全世界最強CEO，是以iPhone攻陷天下的蘋果SteveJobs。
顏色革命
顏色革命，唔係講緊姣婆藍如何冚過大長金。此Fancy名詞乃是國際政壇hit詞，泛指廿一世紀初中亞地區一系列以顏色或花朵命名的和平政權變更運動，如烏克蘭「橙色革命」、格魯吉亞「玫瑰革命」、吉爾吉斯「黃色革命」等。顏色革命大部份由腐敗民主政制催生、獲美國基金支持、以非暴力手法取得極大成效，受到普遍西方社會推崇。
活化古蹟
07年，香港人保家衞古之情燃燒至最高點，政府張貼活化古蹟大綱領，統統有待08跟進再檢討。二人話，政府講活化古蹟，來來去去都着眼於「提高入場人次」，將古蹟變餐廳或旅館，層次極低，缺乏想像力。古蹟不是廸士尼，不需要日日谷行遊客人次，一句講晒，討論如何活化，不如先講點解古蹟需要活化。政府反智，又見一斑。
社會企業
社會企業非新詞，08再翻叮，因為近年社會企業趨勢，是唔捽大將捽卒子，政府專叫民間搞企業貢獻社會，唔敢催大公司揼幾巴仙盈利回饋社會。Gary提到完整的社會企業概念，可包括企業福利政策等問題，鼓勵公司不要dayday向錢看，近日看新聞話日本有企業放失戀假、結婚周年假，本地有冇公司想效法一下？
奧運
數08國際間大事，奧運不可少。電視台周周精選運動員獨白及會場設施，好睇；睇運動員青筋暴現狂喜若醉，更好睇；不過知青話，Olympicsisalsoaboutpolitics，一個國家舉辦奧運，往往構成政治生態變換的轉捩點，例子有南韓、前蘇聯等。北京奧運舉行在即，人權問題又被炒得鬧哄哄。學Steve話齋，「用3百字講3千字都講唔晒的議題，有點不負責任」，我就此打住，料想半年後，全港傳媒必定日夜煲行講到口臭，有興趣者再細跟都未遲。
ThinkTank
同樣，08年翻叮thinktank，因為舊詞現新風。智庫在外國興咗好耐，角色似高官旋轉門、政治新秀培育場，在香港卻不成氣候。不過07年有轉變，葉劉回歸，搞起匯賢智庫，再加上補選一役，令民間公共政策討論氣氛比前濃厚，智經、三十會等智庫類團體於近年成立，人人期待08年智庫類團體出現更多搞作。
通識有二
從來出續集都是當紅指標，不過綜觀香港書市，年中好賣而又出到續集的好書沒有幾本，由青年智庫組織Roundtable策劃的知性入門叢書《通識字典》零個紅人孭飛，講「共產主義」、「公共廣播」等政治社經「硬嘢」，首集居然賣到二千，仲有續集出，可謂書市奇葩，反映香港人有希望！成員Gary與Steve講笑咁講，通識詞典好賣，多得揀啱風水色，「李力持本《真係笑話》都係一本螢光橙一本螢光綠！」
高官濫用知識
話說圓桌一年前出書動機，無非為順應教育界大趨勢，「政府搞通識、三三四，但高中老師根本無人識教，我們想用深入淺出的方式為大家補補底。」Gary說。揀字解詞，越做越有大志，「近年高官喜歡撻terms，用似是疑非的概念愚弄民智，左一句『大市場小政府』、右一句『活化古蹟』，大家就啞晒，被人牽着鼻子走，導致社會出現濫用知識的氣氛。其實人家講個terms，唔代表佢啱晒，更唔代表你一定要受。這本書就是要釐清概念，幫助市民批判思考。」Steve補充。幾時都話，知識就是力量，小市民識幾個字，可以同政府鬥大聲。
加送一湯
《通識詞典３》？？？
二人預估《通識詞典3》將掀起搶購熱潮、書展逼爆玻璃、一人一本……不過出書之日暫時遙遙無期。知青許下豪語，看官即管期待，不過冇一二何來三呢？《通識詞典》1及2於各大書局熱賣中，行過書局不妨望望。
