劉德華喺紅館開緊演唱會，唱埋聽日尾場就大功告成，過去16日，華仔每日喺紅館開騷，好多狗仔隊日日喺紅館埋伏，為嘅係想影到華仔傳聞中嘅女友朱麗倩，不過到目前仲未見到。但噚日就有雜誌報道，話早前一年一度嘅佛教盛事水陸法會舉行時，華仔同朱麗倩聯名捐錢畀志蓮淨苑，捐咗一萬元放生，雜誌登咗佢哋嘅供奉紅紙條，仲話據志蓮淨苑嘅負責人講，係親人同有血緣關係嘅人先可以聯名，華仔同朱麗倩嘅夫妻關係因此曝光喎。除咗華仔外，譚詠麟同老婆楊潔薇、胡應湘一家等都有捐獻。
拒再談朱麗倩
華仔噚日直指報道係雜誌自編自導自演嘅新聞，又話：「多謝大家關心，我仲未結婚，𠵱家開緊演唱會好開心，係咁多，以後唔再回應呀。」講到華仔個唱，前晚有好多人捧場，包括黃日華、苗僑偉夫婦、張兆輝、關智斌（Kenny）、陳寶珠同楊天經等等，華仔同歌迷握手時又俾人插損手流晒血，佢行到去同Kenny握手時，Kenny好驚咁問華仔有冇問題，華仔話：「放心，OK！」但轉頭又忍唔住對歌迷講：「握手係用手握，唔係用指甲插嘅，舊傷啱啱好，又俾大家連皮扯到流血呀。」完騷後，華仔急急腳返下榻酒店用火酒洗傷口。黃日華同苗僑偉等去晒同華仔消夜，黃日華提議華仔下次戴手套，仲話近日好多古怪奪命細菌出現，叫華仔小心啲，華仔笑謂：「不如做個鐵手套畀我穩陣啲。」
