劉德華內地歌迷楊麗娟嘅爸爸，舊年因為愛女未能同華仔單獨見面而跳海自殺身亡，原來事件發生後，譚詠麟（阿倫）曾經介紹華仔睇心理醫生，前晚阿倫為華仔個唱擔任嘉賓時，華仔喺台上自爆話：「07年演唱會前，我都經過心情起伏難過嘅日子，當時好多新聞……有啲歌迷做咗啲我自己都估唔到嘅嘢，我記得我接到校長電話，佢帶埋個心理醫生見我，好多謝阿倫開解我，叫我學識有事時要講晒出嚟，同朋友及身邊人分擔，否則07年，你哋都可能失去咗你哋嘅偶像。」
後嚟華仔同阿倫合唱《一起走過的日子》，點知阿倫一攞張貓紙出嚟，華仔即刻撕爛，阿倫好鬼馬咁再攞第二張，華仔又再次撕過，阿倫惟有指住華仔笑住話：「你笑啦你，你試吓老多十年你就知！」
讚兒子夠高大
另外，噚日阿倫喺山頂廣場舉行「TheBestSoundEverReborn」發佈會，將以前《愛的根源》大碟重新灌錄，大會搵咗位10歲小朋友即場唱阿倫嘅歌，阿倫見到個小朋友忍唔住搣對方塊面，又話：「我屋企嗰個12歲（兒子曉風），好似我咁高大，所以我叫嗰個小朋友食多啲嘢。」
