「我嘅座右銘係凡事按部就班。」張敬軒說。
17歲踏足社會，吃了點苦，在樂壇打滾五年後，由月租三星酒店到租住1,400呎豪宅，表示他賺到錢，也守得雲開。
與陳奕迅、李克勤及古巨基等並列爭男歌手獎，這只是頭盤，真正食得有味的主菜應是憑《酷愛》在商台頒獎禮打低大贏家陳奕迅得至尊歌曲，以及入選港台十優歌手，主菜有幾道？可能陸續有來。但甜品先奉上，陳奕迅心有不甘出言揶揄《酷愛》未算至Hit歌，被最受歡迎男歌星妒忌，你說甜不甜？ 撰文：王連連
剛勇奪商台叱咤樂壇男歌手銅獎、憑《酷愛》奪我最喜愛的歌曲大獎及至尊歌曲大獎的張敬軒，入行前為了做歌手的理想，膽粗粗帶着母親給他的5,000大元由廣州來港闖天下，3年「自由行」生活後拿到香港永久性居民身份證，身份與歌聲都融入了香港。張敬軒認為凡事急不來，一步步行才踏實又安全。
「成績好係意外」
張敬軒說：「千禧年我拎住港澳通行證嚟香港做4日嘢，阿媽塞咗5,000蚊畀我，好似上京赴考咁，當時我乜都冇諗，冇諗過會喺香港長遠發展，只係掛住買白色嘅PS2同iPod。就算出咗碟之後，心態都冇變，日日都唔知自己會喺香港做得幾耐就打道回府返廣州。我目標好簡單，只係想做歌手，今日我達到咗就再為第二個目標努力。
「𠵱家我只係想趁後生搵多啲錢，買屋同買車。好多嘢唔急得嚟，你問我幾時可以拎最受歡迎男歌星獎？都係嗰句唔急得，我諗5年時間啦。我今年成績好係好意外嘅事，但眼前嘅嘢可能係虛火，下年可能乜獎都冇。阿媽已經教我，有咁大個頭先好戴咁大頂帽。𠵱家我就係扶緊欄杆開始學行，唔好諗自己好快去到幾高，呢啲冇得呃自己。反而我比較緊張嘅係過埋08年，如果喺香港發展穩定，我就會轉戰內地，跳出廣東省。」
「運氣好遇好歌」
張敬軒覺得自己運氣很好，他說：「我呢幾日上網睇過討論區，啲人覺得張敬軒有今日嘅成績，因為有首《酷愛》，無可否認我運氣好，遇到首好歌。我睇成績睇得好膚淺，呢一行所謂成績好，其實只係睇你嗰年嘅收入同見報率。而呢一行有價值就有新聞，咁就係有成績啦，我冇諗過喺商台拎到咁多獎，每年攞一個獎都好難，我最大感覺只係覺得自己喺頒獎禮坐前咗，唔係坐走廊位。我唔介意人哋話我係二線歌手，因為我係吖嘛！我只係行咗好大嘅一步，𠵱家喺二線頭，每個歌星都係慢慢咁行上去。」
愛的宣言：王菀之係我PatPat
張敬軒跟王菀之的緋聞似是而非，連當事人都解釋不到是否真愛對方，這個還未弄清楚，張敬軒和關智斌（Kenny）的斷背緋聞便已展開，究竟張敬軒直定攣？他說：「我鍾意女仔，因為要傳宗接代。」
張敬軒續說：「傳我同王菀之、又傳我同關智斌搞基，我好肯定話你知，我係鍾意女仔，屋企得我一個仔，我要傳宗接代。好似有套戲咁，鍾意個男人，但又搵個女人生仔？我唔會咁做囉。拍拖其實都幾難，一個人陷入另一個人嘅感情世界係好痛苦嘅，可能我係水瓶座，個人好敏感，我女友唔可以有任何交際生活，唔可以出街，可以有份工，但放工要即刻返屋企搞掂晒屋企嘅嘢，而且電話唔可以調校靜音，我會好似偵探，所以同我拍拖嘅人，道行一定要高過我。」
「瞓埋一張床都得」
當初與王菀之傳緋聞，可有刻意博宣傳？張敬軒承認說：「坦白講，有啲係，但我同佢係有緣無份型。我同佢之間冇秘密，大家好有默契。佢唔開心，我哋會攬頭攬頸一齊喊，我冇錢使，打去問王菀之借5,000蚊，點知佢話冇，掉轉頭我搵到錢就借10,000蚊畀佢。如果要我用身體嘅一部份去形容佢，我覺得佢係我個patpat，我知佢永遠都會backup我，畀我安穩，呢個人係不可缺少嘅。之前話我因為要同佢一齊開演唱會而嬲到拍枱，真係冇可能，就算要我同佢瞓埋一張床都得。」
對於與Kenny的緋聞，張敬軒說：「我只係覺得單新聞累咗佢，呢段時間我好似顯眼啲，所以佢變咗犧牲品，好似我扯埋佢落水、害咗佢咁。所以喺頒獎禮上我特登多謝佢，我唔怕有人會亂諗，因為事實勝於雄辯。」
「阿媽係野蠻奶奶」
離鄉別井後，張敬軒的工作越來越多，與家人敍天倫的時間難免減少，張敬軒因而學會珍惜，他說：「以前爸爸媽媽鬧交，我負責做和事老，呢幾年屋企有乜嘢事都唔會即刻同我講，我幫佢哋解決問題嘅機會少咗，我會更珍惜同佢哋相處嘅時間，可以同佢哋一齊食飯會好開心。
「以前父母咿咿哦哦我，我會覺得好煩，𠵱家我就唔會再叫佢哋收聲。咁多年嚟我有個格言：眼前所有嘢唔係應份，幸福唔係必然。講落好似好老土，但係事實。」
「佢好夠薑」
張敬軒續說：「《叱咤》頒獎禮第二日，我打電話返屋企，聽到媽咪把聲好似喊緊，我估佢一邊睇電視一邊喊。媽咪喺事業上幫我好多，由舊年開始，佢做咗我廣東省演藝總代理，記得佢當初唔識洪廸（環球高層），但佢夠薑唔知喺邊度搵到洪廸嘅電話，然後同佢傾代理、拆賬嘅問題。媽咪第二次嚟香港，就已經簽約喇，所以我都話將來我娶咗老婆，媽咪一定係野蠻奶奶。」
