李克勤於農曆新年舉行個唱，他昨日宣佈加開三場，前後共演十場，打破其個人紀錄，克勤即大讚乖仔腳頭好。他早前更訪問鄭秀文（Sammi），克勤還爆Sammi為其子畫了一幅畫，但她將男性特徵放大了數倍。
李克勤下月農曆新年會舉行「2008用心聆聽你的克勤演奏廳」演唱會，他昨日在紅磡開記招，宣佈2月8日舉行的個唱將加開2月15至17日三場，前後共演十場，打破自己的演唱紀錄，他說：「今次冇得再加，因為之前有容祖兒，原本我都欠人哋飛，𠵱家紓緩咗，其實早兩日已經想公佈加場，因為知道有人喺網上炒賣，不過因為印唔切飛先至遲咗。我覺得十場係最理想同最完美嘅數字。」
廣邀嘉賓助陣
對於個唱甫開賣就售罄，克勤同意是因為乖仔李立仁腳頭好，他笑說：「唔知會唔會有啲關係，冇諗過會加到十場，佢腳頭好，股票又咁好，不過我唔會叫佢嚟睇，因為太嘈。」克勤透露現已邀請了關淑怡、陳慧嫻及譚詠麟做嘉賓，並打算邀請同門師弟張敬軒。
早前克勤為配合個唱宣傳為無綫拍攝了音樂特輯《高清演奏廳》，邀請了鄭秀文接受訪問，他表示事前Sammi沒有問過訪問內容就答應訪問。
克勤說：「佢真係好幫手，所以個唱我都請咗Sammi嘅父母嚟睇。喺節目內我哋好似傾偈咁問佢近況，因為我哋喺16年前合作過《浪族闊少爺》，𠵱家佢轉變好大，啲人叫佢『四萬』，我就話係『八萬』，我感覺到佢嘅開心，而且佢比起以前靚咗好多，嗰時佢係肥妹仔一名，𠵱家就有苗條身形。」
畫像不宜公開
克勤還表示收到Sammi親筆繪畫的乖仔畫像，不過她把愛兒的男性特徵放大數倍，所以克勤笑稱絕對不能讓其他人見到，他表示日後會向愛兒說明這幅畫像是「Sammi姨姨」送給他的。
採訪：駱華齡 攝影：黃文成
