新年伊始，內地電力股開年第一宗大新聞居然唔係「煤電聯動」。話說人稱「CEO公主」、原本出任中電國際（2380）副董事長嘅李小琳，經已喺元旦日坐正，升做公司董事長。唔單止咁，李小姐仲同時做埋持有公司60%股份嘅中國電力董事長。
據中電國際通告話，李小姐嘅委任並冇特定任期，而喺截至06年12月底止年度內，佢嘅年薪大約係126.9萬元。不過，通告冇講到李小姐坐正後，會唔會加人工。華華估計，升咗成個grade，唔多唔少都要加啲做獎勵，若果唔係，搵邊個同你睇住間公司？
咁做開董事長嘅王炳華又點呢？通告話，王生因工作調動關係，已辭去董事長及非執行董事職務，仲講明王生同董事局並冇意見分歧。其實大家都等咗李小姐坐正好耐，今次女電王終於正式掌舵，會唔會意味中電國際稍後有大動作呢？